Segun Parlamentario Tromp-Lee, e ta hopio orguyoso di e logro di Minister President. E intencion mes di Hulanda pa duna Aruba un KB, Tromp-Lee ta haya uno inhusto y inaceptabel. Desde cu Gabinete Wever-Croes a tuma e timon over nan a bin ta haci lo corecto y desde un principio a purba trece orden den e desorden cu Gabinete Mike Eman a ocasiona. Mas ainda Parlamentario Tromp-Lee ta indica cu e ta haya inhusto y inaceptabel cu Hulanda ta keda bin cu exigencianan cu lo conduci cu nos pueblo lo mester sigui sufri pa e maneho iresponsabel di Gabinete Mike Eman I y II y e fayo den supervision di parti CFT.
Tromp-Lee ta enfatisa cu Minister President, sra. Evelyn Wever-Croes, a demostra cu e no ta un hende muher cu ta hunga welga di hamber y pensa cu e problema ta resolve su mes. Nos Minister President actual ta un hende muher cu ta tuma accion cu determinacion y curashi, cual a conduci cu diabierna mainta 22 di november 2019, Aruba a lanta sin un KB. Contrario na e deseo di contrincantenan politico, Minister President di Aruba a logra convence Conseho di Minister di Reino pa no tuma e decision pa duna Aruba e KB cu tabata riba agenda.
Segun informacion ricibi for di Minister President, Tromp-Lee ta splica cu a keda bon presenta durante dicho reunion cu Aruba a cera presupuesto 2020 teniendo cuenta cu e preocupacionnan di CAFT specialmente riba e punto di gasto di personal. Conseho di Minister di Reino a dicidi pa duna Aruba tempo pa finalisa e proceso di presupuesto 2020 y una bes e presupuesto keda aproba pa Parlamento y ta cumpli cu e normanan stipula, e KB lo wordo kita definitivamente for di mesa.
Hopi di nos contrincantenan ta rabia y ta purba di haci manera cu awe no ta un dia di logro, pero e realidad ta cu Minister Presidente di Aruba ta regresa cas diasabra sin un KB y cu tempo pa sigui traha pa hiba nos Aruba dilanti demostrando disciplina financiero y trahando duro pa logra un finansas sostenibel y duradero.
Segun Tromp-Lee realidad ta cu tur cifra ta mustra bon. Gabinete Wever-Croes ta hibando un maneho serio y responsabel caminda mescos cu na 2018, tur cifra ta mustra cu nos lo cera 2019 cu un presupuesto supletorio Budget neutral. Gobierno a bin ta cumpli cabalmente cu e apoderacion cu nan a haya pa loke ta trata presupuestonan cumpliendo adicionalmente cu e normanan den protocol. Y pa aña 2020 Aruba despues di 12 aña porfin lo conoce un presupuesto cu ta indica un surplus.
Finalisando Tromp-Lee ta bisa cu pueblo por tin tur confiansa cu e Gobierno aki, cu Partido MEP, lo sigui traha pa saca Aruba di e desaster financiero cu AVP y Mike Eman a hinca nos aden. Danki na e sosten y confianza. Gobierno ta riba e bon caminda y a logra pone un paro na e desaroyo devastador cu Mike Eman a hinca nos aden.