Parlamentario Endy Croes mester cuminsa na felicita Minister Presidente Evelyn Wever Croes cu un logro hopi grandi. Dia 22 di november Aruba tabata riba agenda di Rijks Ministerraad na Hulanda pa trata un posibel Aanwijzing unda Hulanda lo por a drenta y tuma control riba algun aspecto financiero. Entre otro locual tabata pisa hopi pa Hulanda ta e personeelskosten di pais Aruba cual ta ancra na 479 miyon florin pa cu aña 2019. Desde augustus menasanan tabata bin den direccion di Aruba pero tanto augustus, september y october esaki a keda na menasa pero no a pone Aruba – di acuerdo cu afspraken 3 siman promer cu e reunion – riba agenda.
Finansas di Aruba riba bon caminda
Lamentablemente CAFT a duna un conseho positivo pa un Aanwijzing (hopi onterecht) y mesora (Hulanda) Knops a agrega e punto aki cu e tempo necesario pa trata posibel Aanwijzing pa Aruba riba agenda oficialmente durante Rijks Ministerraad di 22 di november ultimo. Apesar cu a haci multiple intento splicando Hulanda cu prueba, con financieramente Aruba ta riba e bon rumbo esaki no a yuda pa kita Aruba for di agenda. No obstante cu Aruba no ta presta sumanan manera 443 miyon na (2012), 333 miyon (2013), 444 miyon (2014 = KB) pa cera begroting, pues gobernacion di AVP pero den 2019 solamente 4 miyon y den 2020 nos lo no ta presta mas pa cera presupuesto pero ta bay tin un surplus di 29 miyon cumpliendo asina cu e protocol y aspraaknan cu Hulanda, por tuma nota cu Hulanda a laga e tema di Aanwijzing pa Aruba riba agenda.
Contraste real den liderazgo
Minister Presidente Evelyn Wever Croes a opta pa subi avion “Su So” sin ningun hende mas y a dirigi su mes na Hulanda pa duna cara y atende e reunion aki en persona. Nos por corda cu na 2014 Mike Eman a opta pa drenta welga di hamber, sinta bou palo bebe Ensure y yama su activistanan bin bati weya dilanti cas di Gbernador gritando “firma awor” pidiendo Gobernador pa firma un begroting cu un deficit di 9.3% di GDP, esta 444 miyon. Esaki ta e contraste real den “Leadership” y pueblo por huzga pa su mes kico exactamente ta caracterisa un Lider dedica y determina cu amor pa su pueblo.
Parlamentario Endy Croes ta felicita Minister President Evelyn Wever Croes, Gabinete Wever Croes y sigur Minister di Finansas Xiomara Maduro y su team negociador cerando un presupuesto 2020 sin “sugar tax” y sin extra “BBO” cual topiconan berdad tabata riba mesa y alabes cumpliendo cu personeelskosten ancra den e protocol. MP Evelyn Wever Croes a logra bari e Aanwijzing por lo pronto for di mesa. Lo mester cumpli cu algun rekisito den e begroting 2020 pa asina kita e posibilidad di Aanwijzing totalmente pero pa esey nos tin tempo. Minister President Evelyn Wever Croes, Aruba ta orguyoso di bo. Nos lo sigui hunto dilanti y Sin Miedo!