Parlamentario Endy Croes analisando ultimo añanan di politica na Aruba ta constata cu evidencianan cu ta papia pa nan mes e diferencia grandi den “Leadership”. Mike Eman na un manera sin escrupulo a crea un Mega Debe lagando atras su legado di un pais den decadencia teribel cu un finansas publico destrosa na manera sin igual. Banda di esaki Mike Eman a laga atras un Crisis Social y instancianan sin ningun placa, sin rumbo y sin direccion. Nos no lo kier recorda ni ripiti e storia cu a schock comunidad. Mike Eman a percura tambe hunto cu su “carro loco” Dowers pa laga seguridad di Aruba na werki. Atraco tabata na ordo di dia den tur skina y joyriding di auto no tabata cos di conta mes. Esaki ta e imagen cu Coalicion a hereda na november 2017.
Un situacion caotico bao di Gabinete Eman
Riba e parti financiero Mike Eman tabata presta masha hopi placa pa cera presupuesto di cada aña y na final di aña su Stempel Parlament den luna di december tabata bolbe aproba extra miyones como suppletoire begroting di placa cu ya Mike Eman y AVP a gasta caba. Un situacion caotico. Na 2011 Mike a presta 325 miyon pa cera su deficit, na 2012 (443 miyon), na 2013 (333 miyon), na 2014 (444 miyon plus un KB). Feestvierend ten ondergaan. Aki Hulanda a cay aden y CAFT a bira un realidad. Na 2015 e deficit a baha na 185 miyon pero ainda leu di cas. Mike Eman momento cu gobernador a nenga di firma su presupuesto cual su Stempel Parlament a aproba na 2014, Mike a bay sinta bou palo di kwihi y a drenta welga di hamber. Ken no ta corda esaki? Mike Eman scondi bao tent tabata bebe Ensure y marduga hasta steak nan tabata hiba pe. Mike Eman kier a gaña muri kere cu asina lo regla su mal maneho financiero cu Hulanda. Mike Eman a invita su cheersleadernan di Parlamento y coordinadornan pa bin bati weya gritando dilanti cas di Gobernador “firma awor”. Te hasta Mike Eman a instrui su hendenan pa tira auto di Gobernador cu webo putri. Prohibi pa lubida!
Kico ta caracterisa Leadership di un pais?
Awe net dos aña despues di caida di regimen Mike Eman y AVP por nota cambionan grandi. Evelyn Wever Croes y su team a percura pa balansa den corto tempo e presupuesto di pais Aruba. Den 2018 un presupuesto suppletoire budget neutral y den 2019 esaki ta mustra di lo ta mesun cos. Pues no ta bin pidi extra placa na final di aña. Den 2019 deficit cual den protocol ta ancra na -0.5% (25 miyon florin) ta mustra cu lo sali mucho mas faborabel pa Aruba, esta solamente -4 miyon florin. Presupuesto 2020 lo cumpli cu un Surplus di 29 miyon y asina cumpli cu e Protocol. Aruba, scoge pa bo mes kico ta caracterisa Leadership di un pais. Ora Hulanda presiona bo, bo ta bay den welga di hamber y gaña muri bou palo keriendo asina bo lo resolve e desaster cu bo mes a permiti? (Mike Eman lider di AVP). Of ora Hulanda presiona bo, bo ta subi avion bay duna cara y trata na resolve tur inkietud na beneficio di bo pais na mesa? Wel Evelyn a scoge pa bay Hulanda y awe felizmente a logra un bon noticia cu Aruba no lo haya un KB. Mike Eman nunca pero nunca mas por bini bek. Pabien Evelyn Wever Croes. Aruba ta orguyoso di bo.
