San Nicolas ta mira y experiencia e cambionan positivo
Prome Minister di Aruba Evelyn Wever-Croes tawata presente na e “groundbreaking event” di e proyecto Baby Beach Waterfront caminda cu el a habri e anochi cu su discurso felicitando San Nicolas cu un otro proyecto bunita. Presente na e groundbreaking tawata Ministernan, Parlamentarionan, SNBA y un publico grandi. E ceremonia a tuma luga na Colony. Premier Wever-Croes a expresa: “Esaki ta muestra palpable cu Gabinete Wever Croes, ta pone man na obra pa duna San Nicolas e impuhe necesario pa desaroya e area aki”.
Recientemente, Gobierno a tene Ministerraad pa prome biaha na San Nicolas specialmente pa enfoca riba e proyectonan pa cu e area aki. E compromiso cu San Nicolas ta uno serio y na su debido tempo e pueblo di p’ariba di brug lo mira cambionan grandi cu mester trece un desaroyo hopi positivo den e barionan p’ariba.
Minister di Turismo Dangui Oduber ya caba a renoba y a haci e reapertura di e oficina di turismo den San Nicolas. Minister Chris Romero a renoba y a haci reapertura di e oficina di Setar den San Nicolas. Minister Otmar Oduber a cuminsa cu trabounan di embeyecemento di caya grandi y awo a tuma luga e groundbreaking di e proyecto di Baby Beach.
Pa hopi aña e pueblo di San Nicolas a pidi y warda pa desaroyo di proyectonan yega den su barionan.
Cu e groundbreaking aki e fundeshi pa sigui desaroya San Nicolas turisticamente ta un hecho. Tambe e comunidad di Aruba completo por haci bon uszo y disfruta di e desaroyo aki.
Paulatinamente gabinete Wever Croes ta fortificando e fundeshi no solamente pa aporta na nos industria di turismo, pero alaves crea e cadena pa tur otro actividad economico por ser desaroya y asina trece mas prosperidad pa un y tur.
San Nicolas tin Gabinete Wever-Croes su atencion total y e pueblo aki tambe por ta orguyoso di mira y experiencia e cambionan positivo tan anhela.
Un pabien na Aruba y San Nicolas y Minister di Turismo Dangui Oduber y su ekipo pa nan trabou y esfuerso pa cu e proyecto aki.