Gabinete Wever-Croes tin como un di su prioridadnan pa incentiva y impulsa San Nicolas su gestion economico. Den combersacion cu Minister di Transporte, Comunicacion y Sector Primario, sr. Chris Romero, el a duna di conoce “cu pasonan firme nos ta keda ratifica nos compromiso pa duna P’Ariba di Brug su protagonismo mereci. Un protagonismo cu lastimamente den pasado e area aki di Aruba no a haya pa decadanan”.
Den cuadro di Gobierno di Aruba su vision pa restructura e atractivo di Caya Grandi di San Nicolas su comercio, Ministerio di Transporte, Comunicacion y Sector Primario, conhuntamente cu Setar NV, ta instalando un sistema WiFi cu lo cubri henter e area aki y lo no tin ningun costo pa e usuario. Den palabranan di e titular di e Cartera di Comunicacion: “Internet awendia no ta un luho mas, pero e ta un necesidad. Door di trece e innovacion aki den nos Caya Principal di San Nicolas, nos ta buscando di duna un incentivo extra na e personanan pa bishita y haci uzo di e diferente servicionan cu e establecimentonan ta duna na San Nicolas. Asina nos lo crea tambe un trafico mas amplio di hende na San Nicolas, cual lo traduci den mas benta pa e comerciantenan cu ta estableci den e area aki”.
E prome fase ta cla
Actualmente e prome fase di WiFi pa Mainstreet San Nicolas ta cla. Esaki ta nifica cu e area entre Warda di Polis y Stacion di Arubus ta conta cu señal di WiFi y e ta un servicio gratuito pa tur persona cu ta den e area ey. Minister Romero a sigui bisa: “Nos por anuncia satisfactoriamente cu e prome fase di WiFi gratis pa Caya Grandi di San Nicolas a keda cla. Esaki ta core for di Warda di Polis te cu Stacion di Arubus. Aworaki caba e bishitantenan, trahadornan y habitantenan den e vecindario aki lo por subi internet completamente gratis”.
Mientrastanto, e segundo fase ta den ehecucion caba y pronto Aruba lo por conta cu un Caya Grandi di San Nicolas como un ‘Free WiFi Spot’ pa tur su bishitantenan.