Diamars mainta Parlamento a trata un ley hopi importante. E ley ta importante pa e solo echo cu su meta primordial ta pa salvaguardia nos medio ambiente y naturalesa. Cu e ley aki Gobierno ta enfatisa na mes momento ariba e necesidad grandi cu tin pa duna importancia na nos recurso natural. Ta keda na cada un di nos cu ta biba aki na Aruba pa duna nos granito di arena pa respeta y cuida nos recursonan natural. Nos recursonan natural ta masha amplio. Ta encera nos matanan, bestianan, nos bunita beachnan, nos duinennan, baranca y piedranan y sigur nos bida marino y coralnan. Door di mustra y duna respet na nos recursonan natural, nos ta incentiva nos bishitantenan tambe pa haci esaki.
Un manera di mustra respet sigur ta door di cuida nos recursonan y no trece nan den peliger. Un di e manera di proteccion ta pa nos cuminsa uza productonan sostenibel. Y cu e ley cu nos a trata diamars sigur Aruba ta dal un stap hopi grandi den e bon direccion. Cu e ley aki nos ta elimina e.o uzo di algun productonan di plastic di un solo uzo y ta percura pa na Aruba nos cuminsa uza productonan biodegradabel cu ta cumpli cu e exigencianan describi den e ley. Alabes e ley cu nos a ta trata diamars mainta ta prohibi uzo di cremanan anti solar cu ta contene cierto kimico (oxybenzone). Mi mester remarca cu e kimico aki bo no ta haya solamente den productonan anti solar pero tambe den hairspray y cierto cosmetica. Mirando cu e kimico aki, segun investigacion scientifico, ta mata nos coralnan y ta caba cu e biodiversidad marino, mi ta contento cu awe Gobierno a presenta e ley aki cu lo tin un rol preventivo.
E ley lo yuda tene nos naturalesa y medio ambiente den un estado sano pa nos mes y pa nos futuro generacion.
Ta bon pa pueblo ta informa cu e ley cu Parlamento a trata awe ta encera prohibicion di e importacion, benta, distribucion, y entrega gratis di productonan di plastic di un solo uzo y productonan cu ta contene oxybenzone.
No obstante e echo cu mi ta contento cu e ley aki, mi kier para keto un rato na e realidad den su totalidad aki na Aruba. Hopi biaha como sociedad nos ta reacciona, cuestiona y hasta protesta ora cu algo ta molestia of a irita nos, por ehempel dia a kap e matanan den Franse Pas, corta e mangelnan pa a traha un brug, ora ta core cu ATV’s iresponsabelmente, pero despues di un siman tur hende a lubida. Nos naturalesa y medio ambiente ta toca nos tur diariamente y henter nos bida. No un dia of un siman so. P’esey ta nos deber pa percura pa nos recurso natural keda protehi y salvaguardia pa nos siguiente generacion. Y nos no mester lubida nunca cu nan t’ey pa un motibo y nos di un forma of otro ta dependiente di nan.
Mi ta termina felicitando Minister Otmar Oduber y su team completo di Ladies cu a traha duro pa presenta e ley aki y alabes kier a gradici tur stakeholders, comerciante, restaurant, hotel etc cu ya caba, anticipando introduccion di e ley aki, a haci e cambionanan necesario y a cuminsa usa productonan biodegradabel.