Home Politics Pabien Aruba cu e logro historico di e ley di prohibicion di...

Pabien Aruba cu e logro historico di e ley di prohibicion di articulonan di plastic di un solo uzo como tambe Styrofoam y Oxybenzone 

SHARE

 

 

E ley aki ta na beneficio di nos medio ambiente y salud di e ser humano, cual ta aspectonan cu ta cuadra cu e vision di Gabinete Wever – Croes pa adheri na e Sustainable Development Goals (SDGs), specialmente numbernan 12, 13, 14 y 15. Por bisa cu Aruba por medio di e ley aki cu a wordo pasa unanimamente den Parlamento a mustra con den forma uni un Pais por traha pa bay dilanti y traha hunto pa salvaguardia su futuro. Di e forma aki ta posiciona Aruba riba e plataforma internacional como un lider den esaki.  

 

Minister di Desaroyo Teritorial, Infrastructura y Medio Ambiente Otmar Oduber a splica cu e ley tin un impacto hopi grandi pa nos medio ambiente y a papia durante di e ultimo dos añanan riba e importancia di proteccion di nos flora y fauna.  

 

Conforme un Landsbesluit cu lo mester wordo finalisa prome cu 2020, lo prohibi e productonan di mas basico cu ta perhudica den den cantidad grandi, nos medio ambiente. Manera cups, forki di plastic, tayonan, styrofoam box, straw di plastic y mas. Oxybenzone como un ingrediente presente den sunblock tin gran efecto negativo riba nos bida marino, specialmente nos coralnan. Si considera mitar di e totalidad di 1.7 miyon turista cu ta bishita nos isla anualmente, por imagina e impacto dañino cu esaki tin. Mester aplaudi iniciativanan local manera Aruba Aloe y Aruba Life Organics cu ta companianan local cu ta produci productonan alternativa manera e sunblock cu ta organico. 

 

Minister Oduber a sigui splica cu e ley a wordo anuncia for di aña pasa conhuntamente cu un symposium cu tabatin tocante ‘Blue Economy’ na Universidad di Aruba, cu a duna Aruba e empuhe pa sigui den e direccion pa tin un ley di impacto asina grandi manera cu ta e caso cu e ley aki. Proximamente lo traha hunto cu comercio pa mira e alternativanan cu por crea pa e productonan aki, cual realmente no ta dificil si nos bay bek na con e tabata algun decada pasa.  

 

Importante pa indica ta cu e lista cu prohibicion lo ta un lista dinamico cual por keda adapta y elabora riba dje den consulta cu diferente actor importante. E ley a pasa 19 di november 2019 y lo efectua esaki entrante prome di juli 2020. Caminda cu ni importacion ni benta di e producto lo ta permiti mas na Aruba. Dunando tur persona e tempo necesario pa haci nan adaptacion y forma di opera pa por cumpli cu ley. E lista di productonan cu primordialmente lo wordo prohibi lo keda publica den medionan di comunicacion.