Home » Ministerio Publiko Korsou: PROPIO APARATO PA MIDI VOLÚMEN DI ALKOHÒL PA KPC

Ministerio Publiko Korsou: PROPIO APARATO PA MIDI VOLÚMEN DI ALKOHÒL PA KPC

by Admin
0 comment 63 views

For di aña 2017 e maneho di alkohòl (no kore outo betrá òf no fuma) a bin ta haña un forma struktural na Kòrsou. Esaki pa baha e kantidat i evitá morto, personanan gravemente heridá, dalmentu ku outo i tur e otro daño ku korementu di outo fuma por trese kuné. 75 % di mortonan den tráfiko tin di aber ku alkohòl (hopi bia kombiná ku korementu di auto sin bisti faha di seguridat). Ultimamente tur luna tin kòntròl riba uso di alkohòl den tráfiko kaminda ta gara personanan ku a konsumí di mas alkohòl. E personanan aki ta haña en todo kaso un but pa paga i tambe un karchi di kastigu pa un delito. Te ku awor Kuerpo Polisial Kòrsou (KPC) tabata dependé di e aparato pa midi volúmen di alkohòl di Koninklijke Marechausse (KMAR) pa hasi nan trabou. KMAR na su turno tabata yuda KPC ku e kòntròl pa mustra kon pa supla den e aparato ora di kontròl den tráfiko i tambe ku formulá un maneho di uso di alkohòl pa personanan ku ta hasi uso di tráfiko. For di awor KPC ta disponé di su propio aparato pa midi volúmen di alkohòl (‘lease’).
Mirando ku ta un aparato di ‘lease’, awor e aparato ta disponibel kalke momentu di dia. Si algu kibra na e aparato, mesora lo tin un otro aparato. Banda di esaki un gran kantidat di aparato di supla pa preselekshon a bira disponibel. Tin sufisiente agente polisial ku a sigui un treinen pa por traha ku e aparato. Despues di nan treinen, nan a keda apuntá pa hefe di kuerpo. Esaki ta nifiká tambe ku ora di aksidente i dalmentu di outo den kua tin sospecho ku tabatin uso di alkohòl, den sierto kasonan lo por hasi un tèst riba uso di alkohòl. Awor ku KPC tin su propio aparato, e kòntròlnan di tráfiko riba uso di alkohòl lo bira muchu mas, danki na e disponibilidat di e aparato. E aparato ta akordá pa nos lei i ta us’é na Aruba tambe.
Tambe, Ministerio Públiko a hasi un petishon na gobièrnu pa adaptá e lei i asina pèrmití pa tur persona ku pasa den un kòntròl di tráfiko supla den e aparato meskos ku na Aruba, Merka i Hulanda. Esei lo mester bira un siguiente stap ku lo por hisa e chèns di gara un persona ku a usa alkohòl i ta den tráfiko. Di e forma aki siudadanonan lo tuma desishonnan mas responsabel, esta no kore outo despé òf durante ku ta usa alkohòl. Na e momentu aki, e lei vigente ta eksihí ku mester tin un sospecho promé ku mester supla. Sinembargo, aworakí práktika ta mustra ku esun ku ta hasi kòntrol ta konstatando muchu tiki sospecho. Lo traha tambe riba e parti aki, esta di por konstatá un sospecho mihó i registrá esaki.
Ministerio Publiko ta urgi siudadanonan pa no kore outo fuma. Ta deber di kada persona den e komunidat aki pa kòrda riba su propio seguridat den tráfiko i riba esun di su ko-siudadano.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio