Home » Minister Dangui Oduber: Groundbreaking di Baby Beach Waterfront ta pa prepara San Nicolas pa e desaroyo turistico na caminda!

Minister Dangui Oduber: Groundbreaking di Baby Beach Waterfront ta pa prepara San Nicolas pa e desaroyo turistico na caminda!

by Admin
0 comment 62 views

SAN NICOLAS – Dialuna anochi a tuma lugar e groundbreaking oficial di Baby Beach Waterfront na Baby Beach. Esnan presente e anochi aki tabata entre otro Prome Minister Sra. Evelyn Wever-Croes, Minister Sra. Xiomara Ruiz-Maduro, Minister Sr. Andin Bikker, Minister Sr. Chris Romero, Presidente di Parlamento Sr. Ady Tijsen, Honorabel miembronan di Parlamento, CEO di ATA Sra. Ronella Tjin Asjoe-Croes, Presidente di SNBA Sr. Andres Hernandez y demas invitadonan. Tabata net 4 dia despues cu San Nicolas ta haya groundbreaking di su prome hotel cu tabata algo historico y awor tin un groundbreaking pa un otro bunita proyecto. Un proyecto caminda un bes mas Gobierno ta demostra cu San Nicolas ta haya su fair share den henter e desaroyo di pais Aruba.

E anochi aki Minister di Turismo Sr. Dangui Oduber a hiba un discurso caminda e mandatario a expresa lo siguiente. “Cu e proyecto aki nos lo bay upgrade henter e area di Baby Beach pa asina prepara San Nicolas pa e desaroyo turistico cu ta na caminda. Nos vision ta pa converti San Nicolas den e capital turistico di Aruba y cu hechos nos ta demostrando cu esaki no ta solamente un soño sino esaki ta un vision cu nos Gobierno ta ehecutando. Mi ta sumamente contento y orguyoso di ta forma parti di e coalicion aki pasobra e sosten cu mi ta haya di tur colega Minister pa ehecucion di e tipo di proyectonan aki ta enorme y sigur mi kier a gradici cada un di mi coleganan pa kere den e proyecto aki” esei tabata palabranan di Minister Dangui Oduber durante su discurso.

E proyecto di Baby Beach lo bay wordo ehecuta den 2 fase y ta un proyecto di 3.6 miyon florin. Fase1 lo tin un duracion di 8 luna, asina cu fase 1 termina lo cuminsa dibiaha cu fase 2.
Fase 1
E prome fase lo bay consisti na embeyesemento y ampliacion di e beach, esaki debi na e desaroyo hotelero cu tin, pesei lo bay haci e beach mas grandi pa e comunidad. Fuera di esaki ta bay tin restaurantnan di clase y tambe lo bay tin kioskonan. Ta bay construe facilidadnan pa nos localnan y turistanan. Ta bay crea espacio pa parkeer, ful e area lo haya iluminacion y e landscape tambe lo haya un upgrade.
Fase 2
Fase 2 lo tuma lugar unda e canchanan di tennis ta situa na Baby Beach, den e fase aki lo bay construi 4 cancha di deporte den diferente diciplina. Di e manera aki ta termina e proyecto dunando ful e area aki un upgrading creando mas lugar unda nos localnan por practica deporte.

Minister di Transporte tumando pasonan grandi instituyendo San Nicolas Ports Authority cu lo precura pa e fast ferry tan spera, nos Minister di Finanzas cu su vision economico fiho y su empeño pa San Nicolas como e capital historico di Aruba. E vision di Gobierno ta pa stimula e economia di San Nicolas door di trece e fluho di turistanan di pabou di brug pa pariba di brug. Cu e proyectonan aki ta preparando San Nicolas pa e desaroyo cu ta na caminda.

Finalmente Minister Dangui Oduber a gradici tur cu a haci e proyecto bira un realidad, e mandatario a gradici su colega ministernan. E mandatario a gradici Minister Otmar Oduber pa tur su bon cooperacion y pa pone e fondonan disponibel, tambe na ATA pa a kere den e proyecto y aloca e fondonan necesario pa realisa esaki. E mandatario a gradici DIP, DOW y por ultimo na e contratista Van Kessel cu lo ta esun encarga cu e proyecto aki. Masha pabien na henter nos comunidad pa cu e bunita proyecto aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio