Lider di Fraccion di POR den Parlamento, Marisol Lopez-Tromp a informa cu diaranson 20 di november, riba Dia Internacional di Derecho di Mucha lo inicia e reunion publico den Parlamento pa loke ta trata e ley di Ombudsman y Kinderombudsman (Defensor di Pueblo y Defensor di Mucha).
Marisol Lopez-Tromp ta un di e poco personanan cu ta keda den Parlamento cu a bin cu e iniciativa aki y fraccion di POR ta sostene 100% esaki mirando cu ta un ley cu lo garantisa un trato husto y un bon servicio na nos comunidad for di Departamentonan di Gobierno y fundacionnan.
Hopi biaha por scucha e ciudadanonan keha di servicio of cu mester warda añanan pa haya un
contesta riba un peticion of ta sinti cu e maneho pa cu nan no ta uno husto. Na momento cu un
Defensor di Pueblo/ di Mucha bin, el lo tin, pa medio di ley, tur e hermentnan necesario pa den nomber di e
ciudadano haci su investigacion, drenta e departamento(nan), haya tur e informacion y pone
hendenan responsabel caminda cu no ta cumpli cu e ley of ta wordo trata inhusto. Cu otro palabra, Defensor di Pueblo y di Mucha lo bira un otro instancia cu lo eherce control.
Contrario na e posicion di e gobierno anterior, Marisol Lopez-Tromp, Gobierno actual si tin e Defensor di Pueblo y di Mucha como prioridad, nan si ta wak e importancia pa bin cu entidadnan asina na beneficio y bienestar di nos hendenan.
Una bes cu e ley keda aproba den Parlamento, e colegionan halto manera Hof di Husticia,
Presidente di Controlaria General y Presidente di Conseho Consultativo lo bay den un procedura
pa wak cual ta e profesionalnan cu lo bin na remarca pa cumpli cu e funcionnan aki.