Home Sports Impact Taekwondo a sali Best Team den Best of the Best 2019

Impact Taekwondo a sali Best Team den Best of the Best 2019

SHARE
 
Den fin di siman a tuma luga e evento di Taekwondo di mas grandi di Aruba cu ta Best of the Best, unda cu e miho bringadonan di Aruba ta bringa contra e paisnan internacional. E aña aki Surinam, Frans Guyana y Corsou ta e unico paisnan internacional cu a participa den Best of the Best, pasobra cu e promotor a laga Brazil Taekwondo Stichting na caya. Brazil Taekwondo Stichting a habri porta e ora ey pa duna tur scol di Aruba e oportunidad pa participa den Best of the Best 2019.
 
Esaki ta e prome biaha cu a dicidi di bin cu e premio di Best Team den Best of the Best y tur scol di Taekwondo a scoge 5 atleta pa bringa pa e Best Team Cup. Stichting Impact Taekwondo Martial Arts & Sports Foundation a scoge: Ayleen van Geene, Annabella Fernandez, Alisha van Geene, Deevah Loefstop y Rouel Baarh pa bringa pa e Best Team Cup y nan a empata cu Surinam cu 4 pelea gana y 1 perdi. Manera a bisa anteriormente cu e team cu e puntonan di mas halto lo gana y Stichting Impact Taekwondo Martial Arts & Sports Foundation tabata tin 123 punto acumula di su 5 bringadonan. 
 
Dr. Guaicaipuro Jimenez Presidente di Aruba Taekwondo Bond “ARTBO” a felicita Stichting Impact Taekwondo Martial Arts & Sports Foundation cu nan logro y a entreganan e trofeo.
 
Stichting Impact Taekwondo Martial Arts & Sports Foundation a participa na un camp training na Puerto Rico y esaki a duna su fruto cu e logro di Best Team y tambe 3 best fighters. Pabien na Stichting Impact Taekwondo Martial Arts & Sports Foundation cu nan logro den Best of the Best Taekwondo Cup 2019.