Oranjestad – Recien nos isla a yama bonbini na un grupo grandi di Italia cu a scoge Aruba como cede pa nan conferencia internacional.
Alpitour ta un organisacion grandi di biahe na Italia cu varios compania bao nan encargo. Entre otro e compania Turisanda cu ta consisti di agencianan di biahe ‘upscale’.
Nomber di e conferencia aki tawata: “Un futuro inconfundibel – E conferencia di Turisanda ta bay e isla di Aruba.”
Alpitour a scoge nos destinacion pa varios rason pero loke a resalta mas ta cu –apesar di e distancia- nan ta prefera Aruba pa cu e siguridad cu nos isla ta brinda, pa e clima ideal y e variedad di accomodacionnan cu nos destinacion ta ofrece. Aruba ta un di e destinacionnan mas bendi pa e agencianan di biahe presente.
Durante nan estadia di 7 anochi, un programa amplio y diversifica a wordo ofrece na e participantenan unda nan por a disfruta di e bunitesa di nos isla pa medio di excursionnan, eventonan y site inspections na diferente acomodacionnan.
Aruba Tourism Authority kier a yama danki na tur esnan cu a haci e conferencia aki uno exitoso.
