Sinterklaas y su Zwarte Pietnan tey bek y tur mucha bon mucha por spera un bunita regalo den e dianan aki for di Sinterklaas.
Paardenbaai, Oranjestad: Diadomingo pa mas o menos 10’or di mainta Sinterklaas a drenta waf di Paardenbaai, riba e barco Colorado, manera tur aña e ta yega cu su Zwarte Pietnan pa yude parti regalo pa tur e muchanan bon mucha na Aruba.
For di trempan caba por a mira un multitud grandi di hende acumulando riba Harbour Arena y tambe canto di e caminda bay direccion Oranjestad. Hopi mucha contento, varios chikitin yen miedo di Zwarte Piet.
Ora e barco a drenta waf, Sinterklaas a wordo ricibi pa Su Excellencia Minister di Cultura, Xiomara Ruiz Maduro, kende a yama Sinterklaas y su Zwarte Pietnan un caluroso bon bini na Aruba.
Loke a hala nos atencion tabata cu e aña aki, nos no a mira e cabay blanco, nos ta supone cu e cabay lo a bira hopi bieu, no por cana hopi mas y kier a keda sosega, pero esaki no a stroba Sinterklaas di bin Aruba, e cabay e aña aki a wordo remplasa pa un bunita auto Classico, un Camaro Convertibel.
Sinterklaas a sali for di Harbour Arena den e Camaro Classico y a bay direccion Plaza Betico Croes, mayoria di e Piet mester a cana bay Plaza Betico, canto di caminda tabata tin masha hopi mucha y mayornan para ta warda Sinterklaas pa saluda e homber Santo.
Sinterklaas a yega Waf den careda di 10’or di mainta y a yega Plaza Betico te den careda di 1’or pasa. Tabata tin asina hopi hende canto di caminda cu Sinterklaas a tarda hopi pa yega Plaza Betico Croes.
Desde awe Sinterklaas ta na Aruba y por cuminsa spera regalo den e dianan nos dilanti.