ORANJESTAD – Diaranson atardi Minister di Turismo, Salubridad Publico y Deporte Sr. Dangui Oduber tabata presente na e pier di Spaans Lagoen. Demas invitadonan presente e atardi aki tabata entre otro Directiva di Fundacion Centro Pesca Hadicurari y e piscadornan cu ta haci uzo di e pier. Den un ambiente ameno Minister Dangui Oduber a anuncia na tur presente cu e pier di Spaans Lagoen lo haya su renobacion.
Pa varios aña caba e pier na Spaans Lagoen ta den un estado deplorabel, tabata 5 aña pasa cu Fundacion Centro Pesca Hadicurari a haci un peticion pa drecha e pier na e Gobierno anterior pero esaki a wordo hinca den lachi. Minister Oduber si a wak e importancia y a cumpli cu e deseo di e piscadornan, di e forma aki Gobierno ta duna atencion debido na nos piscadornan. E renobacion aki ta wordo realisa conhuntamente cu Fundacion Centro Pesca Hadicurari.Un pier den un bon estado ta facilita nos piscadornan den nan trabou diario y tambe ta duna proteccion na e botonan. Danki na nos piscadornan e restaurantnan na Aruba por ofrece nos turistanan pisca fresco cual ta contribui grandemente na e gastronomia di e cushina Arubiano.
Minister Dangui Oduber kier a felicita pueblo di Aruba y muy especial e piscadornan cu ta bay haci uzo di e pier. Finalmente e mandatario a gradici Fundacion Centro Pesca Hadicurari pa nan contribucion.