Parlamentario Endy Croes ta felicita Gabinete Wever Croes y specialmente Promer Minister Evelyn Wever Croes y Minister di Finansas, Economia y Cultura Xiomara Maduro y henter su team kendenan den menos di 2 aña den gobernacion a logra cambia e rumbo financiero di pais Aruba den su totalidad. A hereda un Aruba na rand di bancarota. A hereda un Aruba pagando 232 miyon florin solamente na interes riba placa cu Mike Eman a presta. A hereda un Aruba unda mester a cuminsa paga 80.9 miyon na proyectonan PPP pa e proximo 20 añanan. A hereda un Aruba cual den 8 aña Mike Eman y AVP a presta 2200 miyon esta 2.2 Biyon florin. A hereda un Aruba cu un Mega Debe unda Mike Eman a grita den cas di pueblo esta den Parlamento cu e ta orguyoso di e debe y e debe t’ey pa cada un di boso conciudadanonan bay pag’e den futuro.
E cabay di campaña di AVP a fayece!
Den tur e turbulencia aki cu retonan enorme casi no manehabel a sinta kibra cabes pa bin cu un plan pa rescata nos pais y crea espectativa pa nos generacion y futuro generacionnan. A presenta un plan fuerte con pa logra esaki. Den conferencia di prensa e siman aki Minister Xiomara Maduro a presenta presupuesto 2020 cu un SURPLUS di 29 miyon, anto sin SUGARTAX. E cabay di troya y cabay di campaña di AVP a fayece. No SUGARTAX! Banda di esaki mester accentua cu e entrada total di pais Aruba pa 2020 ta presupuesta na 1553 miyon mientras gastonan lo ta 1525 miyon. Gastonan di personal ta mira un rebaho di 486 miyon na 2018, pa 479 miyon na 2019 y 476 miyon pa 2020. Interes tambe ta mira un rebaho di 232 miyon na 2019 pa 225 miyon na 2020. Gastonan di Ministernan a baha di 50.8 Miyon na 2017 (Mike Eman cu su 400 coordinadornan) pa 30.6 Miyon den 2018, esta un rebaho di 20.1 miyon igual na 40%. A percura pa aloca 20 miyon pa inversion y 30 miyon pa financia estudio. Subsidio total tambe a conoce un aumento pa 219 miyon.
Bisa ayo na era di Mike Eman
Na 2003 Aruba a conoce un surplus di 172.6 miyon y na 2008 un surplus di 183.4 miyon florin. Ambos tabata bou gobernacion di MEP. Na 2020 despues di 11 aña Aruba lo conoce un Surplus di 29 miyon riba e caminda pa un finansas sostenibel. Bisa ayo na era di Mike “master of disaster” Eman y AVP. Parlamentario Endy Croes ta felicita un biaha mas e curashi y determinacion di nos Promer Minister y Minister di Finansas y mester gradici tur minister pa nan cooperacion pa nan sacrificio pa asina hunto como un team por a logra e resultado grandi aki pa Aruba.
Pabien Aruba nos ta riba e bon rumbo.
