Porfin despues di hopi aña Aruba conoce un presupuesto cu un surplus. E grato noticia aki a keda anuncia dialuna ultimo, dia 11 di november 2019, door di Gabinete Wever-Croes. Un noticia cu pueblo por ta orguyoso di dje, un noticia cu no ta sin mas a yega na dje. Ta un trabou grandi a keda realisa pa por a haci posibel cu Gobierno por a yega na e punto aki.
Den 8 aña Mike de Meza, Juan David Yrausquin y Angel Bermudez a papia so. Den apenas 2 aña di tempo Gabinete Wever-Croes a demostra cu hechonan cu e ta logra presentando un presupuesto cu un surplus. Un surplus di 0.5% di nos GDP cu ta representa un suma di 29 miyon florin. Asina tambe Gobierno ta cumpli cabalmente cu e norma stipula conhuntamente cu Hulanda di un surplus di 25 miyon florin pa aña 2020.
Otro aspecto cu sigur ta remarcabel ta e echo cu Gobierno a logra tambe pa presenta un presupuesto caminda ta cumpli cu e norma pa loke ta trata gastonan di personal. Segun palabracion e suma pa loke ta trata e punto aki mester ta 479 miyon florin y Gobierno a logra presenta e suma di 476 miyon florin. Esaki sigur ta un indicacion fuerte cu e BVP (Beleidsplan ter verlaging van de personeelskosten) y maneho adicional dirigi a cuminsa duna resultado caminda ta realisa, aunke ta cu stapnan chikito, cu e gastonan di personal den sector publico structuralmente lo baha.
Mas cu tur cos pueblo mester ta contento cu nos tin un Gobierno cu a pone un paro na e direccion sumamente malo cu nos Pais tabata bay. Awor nos tin un Gobierno cu a dicidi pa fiha un direccion cu tin como meta specifico pa logra un finansas publico duradero pa por garantisa un mihor futuro pa nos tur, principalmente nos futuro generacion. Nos tin un gobierno cu ta bisa loke e ta bay haci, y ta haci loke el a bisa.