Diadomingo den oranan di atardi riba red social varios persona tabata buscando Clarissa y tabata post mensahenan cu nan lo a paga Clarissa pa mesa di concierto y no a ricibi nan ticket pa por drenta y disfruta di e Concierto di Marco Antonio Solis. E hendenan tabata para pafo y no por a drenta pa mira e concierto. Durante oranan di anochi mas y mas e mensahenan aki tabata wordo publica riba rednan social y tabata hayando hopi atencion.
Dialuna den un programa radial Clarissa a bay duna un aclareacion cu a compromete mas ainda. Enbes di a bay busca un abogado pa conseh’e huridicamente. Posibelmente e entrivista radial aki lo a haci mas daño cu bon.
Oranjestad: Dialuna durante dia varios persona a bay haci denuncia contra Clarissa Arrindell na recherche di San Nicolas y e denuncianan aki a wordo presenta na Ministerio Publico. Fiscal a tuma e denuncianan aki hopi na serio y mesora a duna ordo pa detene Clarissa.
E recherchenan a invita Clarissa Arrindell pa presenta na Warda di Polis di San Nicolas. Manera cu ela presenta na Warda di Polis na San Nicolas, ela keda deteni como sospechoso di Estafa, pa motibo cu elo a tuma placa y no a cumpli cu su deber di entrega tur hende nan ticket di Concierto.
Segun nos a compronde den e programa radial durante un entrevista cu e organisador Sr. Hudson, cu ta trata di un suma di algo mas cu 65 mil florin, cual sigur ta trata di basta ticket.
Den e entrevista durante e programa radial aki, Clarissa a duna su banda di meday y a bin ta bisa cu ela confia un persona cu e suma di placa aki y cu e persona aki lo a desaparece cu henter e suma.
Tambe Clarissa a declara publicamente cu e ta dispuesto pa paga tur esnan cu ela tuma placa di nan, nan cent bek y cu e lo a pasa na diferente banco y personanan pa yude. Ela priminti cu asina cu e haya e cent elo debolbe tur hende nan placa bek.
