E tratamentu di e kaso di ‘ontneming’ kontra di G.S. den apelashon a tuma lugá awe 12 di novèmber i lo sigui 14 di novèmber. E petishon di defensa ta pa 3 testigu presentá den Korte pa keda skuchá. Durante di e kaso den Korte awe, solamente 1 testigu a presentá.
E kaso di ‘ontneming’ aki tin di aber ku un montante di 1.8 mion florin ku Ministerio Públiko ke despohá di G.S. Segun huisio di Ministerio Públiko, G.S. a optené e montante aki di forma ilegal. Ta trata aki di por parte un montante (alrededor di 210.000 florin) ku G.S. segun Ministerio Públiko, a optené na 2010 pa medio di soborno i labamentu di plaka. G.S. ya a haña un kastigu irevokabel pa e echonan kastigabel aki. Korte den Kasashon a mantené su kondená.
E otro parti di e demanda pa despohá for di G.S. ta enserá un montante di alrededor 822.000 florin. Ministerio Públiko ta sali for di e punto di salida ku tin sufisiente indikashon ku G.S. a optené e montante di mas ku 8 tòn aki tambe di forma ilegal, esta pa medio di echonan kastigabel manera soborno i labamentu di plaka. E hues enkargá ku kasonan di despoho den korte di promé instansia a sigui e liña di Ministerio Públiko den esaki i riba 30 di ougùstùs 2018 a tuma e desishon ku G.S. a optené 1.8 mion florin di forma ilegal i a imponé un obligashon pa paga e montante aki na Estado.
Den kaso di inkumplimentu, G.S. lo mester karga ku un kastigu di prizòn di 3 aña. G.S. a bai den apelashon kontra e desishon aki i Korte a atendé e apelashon aki por parte awe 12 di novèmber i lo sigui ku esaki dia 14 di novèmber.