Manera ta conoci, desde cu Minister Oduber a asumi e responsabilidad como e mandatario encarga cu desaroyo teritorial, infrastructura y medio ambiente, a pone hopi enfoke riba e creacion di transparencia den e proceso di otorgamento di tereno. Como tambe transparencia den e manehonan cu tin na e departamentonan DOW y DIP.
E maneho di mas recien cu ta wordo introduci ta pa regula e casitanan crioyo, conoci como e ranchonan rond di Aruba na costanan y riba rif.
Pakico e maneho aki?
Pa control y vigilancia. E ta necesario pa regula locual ta pasando cu e casitanan aki pa cual ningun hende ta parando responsabel. Hopi biaha tin hopi sushi rond di nan, ilegalidad cu ta tuma luga den nan y actonan inmoral. Cu e proceso cu ta cuminsa cu ne, esnan cu ta reconoce cu e casita ta di nan lo haya un permiso pa esaki y pa cual lo mester para responsabel tambe.
Pa evita cu e cantidad ta sigui aumenta. Desde cu a anuncia e maneho, no ta permiti pa mas di e casitanan aki wordo construi. A traves di imagenan satelite lo controla anualmente e cantidad di casita cu tin y si tin cu a bin acerca. Casitanan cu acerca no lo wordo permiti y lo wordo remove. E casitanan existe tampoco ta wordo permiti pa amplia.
Te cu aworaki DIP a haya hopi bon remarke desde cu a anuncia e maneho nobo di ranchonan / casitanan banda di lama comienso luna pasa. Personanan a pasa y registra na DIP pa cual director di DIP Haime Croes a duna di conoce cu a ricibi varios persona. ‘Mas o menos 90 persona a pasa DIP pa inscribi y entre nan algun a bay cu e formulario pa yena y trece esaki bek.’ Te ainda comunidad por pasa pa yene e formulario pa di e forma aki contribui na e control/ vigilancia y siguridad.