Fundacion Enseñansa Personalisa “Mi Ruta” ta cla pa ricibi hobennan cu tin necesidad den enseñansa na midi pa asina logra obtene un diploma di MAVO of HAVO via landsexamen y trahando hunto cu un scol publico.

Nos tur ta desea cu cada hoben lo por sigui scol secundario den enseñansa regular. Pero cierto hoben no por sigui enseñansa regular pa via di cierto condicion cu nan tin. Por ehempel esnan cu tin spectrum di autismo, esnan cu cierto limitacion fisico of esnan cu ta bou tratamento medico cu no ta permiti nan bay scol ful dia.

Pa e hobennan aki, cu ta motiva pero no por bay un scol regular, enseñansa personalisa ta e solucion. Fundacion Enseñansa Personalisa “Mi Ruta” ta un fundacion cu ta ofrece guia na e alumnonan entre 12-17 aña. Nan ta inscribi nan mes na e scol di nan nivel y lo haya acceso na tur material pa e alumno. Tambe lo por comunica cu e docentenan di e scol via medio di comunicacion moderno. Cu e guia di Mi Ruta y trahando hunto cu e scol lo prepara e hoben pa su pruebanan durante aña escolar. Di e manera aki nos ta guia e alumnonan pa asina na final nan por obtene un diploma di scol secundario MAVO/HAVO via landsexamen.
Nos meta ta pa stimula e alumnonan den nan desaroyo pa nan por logra yega na nan potencial y bira miembro valioso di nos comunidad.
E directiva di e fundacion Mi Ruta ta consisti di diferente profesional cu hopi aña di experiencia den enseñansa.

E guia cu Mi Ruta ta ofrece ta den un ambiente sigur di cas y den un grupo chikito. Tambe nos ta tene cuenta cu e ritmo y necesidad personal di cada alumno. E programa di scol lo wordo adapta na e capacidad di e alumno. Ademas Mi Ruta tin un cooperacion estrecho cu e scolnan publico.

Enseñansa personalisa lo percura sigur pa trankilidad di e hoben y di e mayornan. Cu guia di un profesional den un ambiente di cas y trahando hunto cu un scol, exito ta garantisa. Fundacion Mi Ruta ta situa na Tanki Leendert 229B. Pa mas informacion por tuma contacto cu nos na telefoon: 5929101 of sigui nos riba nos Facebook page Mi Ruta.