Durante un anochi ameno cu e tema di aviacion Kiwanis Club of Young Professionals Aruba (KYPA) a instala nan directiva nobo pa e aña kiwanistico 2019-2020. Esaki a tuma lugar na e prestigioso hotel Hyatt PlaceAruba Airport. Un y tur a sa di gosa di un anochi relajante y anima.
Den e “Board of Directors” nobo a keda instala como “Director of Education”: Karem Rasmijn cu lo ta encarga pa educa e miembro nan mas over di Kiwanisy otro tema nan di interes. Como “Director of Fundraising” a keda instala: Joanne Christiaans cu lo tin e tarea pa organisa evento nan pa genera fondo pa asina e club por sigui duna bek na comunidad. Tambe ta forma parti di e board como “Director of Public Relations”: Nylamee Wanga cual ta encarga pa duna cualkier informacion na e publico en general tocante KYPA. Roel Gomez ta keda instala como “Director of Youth & Community”, cual ta e comision encarga cu realisacion di projecto nan pa nos comunidad. Y como “Director of Recruitment & Retention” a keda instala: Jolitza Limonier kende ta encarga pa e parti di miembro nan nobo y organisa evento nan social pa e miembro nan existente.
Locual ta wordo yama “Board of Officers” a keda instala como presidente saliente, Sherellise Ras. Como Vice Presidente y tambe tesorero a keda instala Maurits Ras. Como “President elect” y Secretaria a keda instala Iliën Hernandez y ultimo como Presidente e aña aki a toca turno pa instala Lativa Maduro.
Durante e mesun anochi aki, presidente saliente Sherellise Ras a duna su aprecio na e board cu a dune respaldo durante e aña kiwanistico 2018-2019. Un aprecio tambe a bai na miembro nan cu a destaca y aki a reconoce Lidia Da Silva como Rookie of the Year. Kiwanian of the Year a keda den persona di Carl Quant cual a hasi su maximo esfuerso durante ultimo aña, principalmente cu e parti di fundraising. Tambe riba e anochi aki a yama bon bini na un miembro nobo na e famia di KYPA cual a wordo instala oficialmente: Reyna Abreu.
Directiva di KYPA pa aña 2019-2020 hunto cu tur e miembro nan ta kla pa sigui yuda nos comunidad di Aruba en especial nos muchanan, manera cu KYPA a bin ta haci pa varios aña caba.