Oranjestad, Aruba – Recientemente, Fundacion Parke Nacional Aruba (FPNA) a presenta e plan di maneho preliminario pa Minister di Desaroyo Teritorial, Infrastructura y Medio Ambiente (MinROIM) y henter comunidad. Desde april 2019, ora e maneho di Parke Marino Aruba a traspasa pa FPNA, a inicia cu e trabounan duro pa cumpli cu su prome obligacion legal, cual ta pa skirbi un plan di maneho pa e areanan dentro di 6 luna. FPNA ta realisa cu e ta imposibel pa skirbi un plan di maneho practico cu por wordo implementa mesora sin tur e informacion necesario y pa es motibo a opta pa skirbi un plan preliminario unda ta defini e metanan y balornan principal di conservacion y prioridadnan pa e prome 2 aña, cual lo ta e fase transitorio.
Durante e fase transitorio lo tin enfasis ariba 6 punto:
- Consultacion cu tur partido concerni: FPNA lo sinta cu tur grupo concerni cu Parke Marino Aruba pa asina tin miho bista ariba e usonan principal, posibel argumentonan cu por tin pa conservacion y hunto yega na alternativa cu ta beneficia ambos e usuario y conservacion; 2. Expansion operational: FPNA lo mester amplia e facilidades y equipo pero tambe desaroya
y añadi personal pa por opera y maneha e areanan marino; 3. Conscientisacion: FPNA lo crea un plan di communicacion y cuminsa informa y educa bishitante y publico en general tocante e importancia di conservacion di areanan marino; 4. Investigacion y sondeo: Pa Aruba su naturalesa en general, especialmente bida marino, tin falta di hopi informacion y data. FPNA lo mester haci investigacion y sondeo, no solamente den e areanan mes pero tambe pa e conocimento cu nos comunidad tin di e areanan; 5. Promove conservacion marino: Lo usa e areanan protehi como ehempel con por busca e
balans entre uso y conservacion di nos recurso marino; 6. Sostenibilidad financiero: Pa por maneha Parke Marino Aruba mester di maneranan
duradero y independiente pa por yega na e fondonan necesario pa operacion diario.
Pa comunidad en general y specificamente e usuarionan di e areanan di Parke Marino Aruba ta importante pa sa cu pa e comienso di e fase transitorio di Parke Marino Aruba no a cambia ningun regla ainda. Leynan actual, por ehempel di protection di cierto especienan of prohibicion di cierto methodo di pesca ta keda na vigor tur caminda. Locual si lo por ripara por lo pronto ta cu empleado di FPNA lo ta mas presente na e costanan y areanan marino. Tambe lo sali vacatura pa FPNA por crea e base di empleado necesario pa maneha Parke Marino Aruba.
FPNA lo pronto manda invitacion na tur esnan concerni pa cuminsa cu e proceso di consultacion y reunionan di introducion. E reunionan di introducion aki lo sosode den e luna di december 2019, januari y februari 2020. Despues lo sigui cu encuesta, workshops y mas reunion manera stipula ariba pagina 52 di e plan di maneho (www.arubanationalpark.org). Si bo persona of organisacion no ta ricibi un invitacion, pero si kier forma parti di e consultacion, por fabor tuma contacto cu FPNA via [email protected] .