Durante di e ultimo dos añanan tabatin hopi intercambio di ideanan cu expertonan local y internacional, prome cu por a yega na e momento di inauguracion di e proyecto Watty Vos Boulevard (WVB). E proyecto a yega su fecha di disponibilidad cu tur trafico por haci uzo di dje den forma sigur, sinembargo ta importante pa menciona cu e lo tuma entre tres pa cuater luna mas prome cu completa e proyecto. Den e proximo lunanan lo tuma luga trabou di mehoracion y cambio unda mester y embeyecemento riba e avenida. Unabes cu e proyecto wordo completa y entrega, e compania Mota Engil lo ta encarga pa mantene esaki durante e proximo 20 añanan.
Minister Otmar Oduber durante di anuncio di apertura di WVB conhuntamente cu DOW y Mota Engil, a splica cu e proyecto ta un proyecto cu pa mas di 40 aña a cuminsa planifica y den e ultimo 25 añanan a cuminsa ehecute.
Den transcurso di e ehecucion di e proyecto varios cambio a wordo haci den cuadro di mehoracion di siguridad den trafico y na e embeyecimento di e avenida. Pa esaki a instala un comision encarga cu inclusion di conceptonan y diseñonan local a traves di entre otro matanan local pa duna tur cu ta haci uzo di nos camindanan e ‘sabor’ di nos culturalocal.
Adicionalmente, fondo adicional a wordo poni den e proyecto durante di e ultimo dos añanan, pa DOW por haya mas sosten for di organisacionnan internacional. Pa sigura e standards di e proyecto y evita mas tanto reto cu ta posibel manera tabata e caso cu Green Corridor cu tabatin un retraso di 7 luna. Pa WVB, e retraso di e proyecto ta mas o menos dos luna, debi na e tempo necesario pa atende cu algun punto di preocupacion, prome cu e fecha di completacion di e proyecto.
Finalmente, ta gradici Mota Engil, cual a ehecuta e proyecto y cu a pesar cu na diferente ocasion a reuni y discuti riba e proyecto, finalmente por bisa cu pueblo lo tin un bon proyecto unabes e ta completa. Tambe ta gradici tur input di parti DOW y tur stakeholders envolvi, den realisacion di proyecto. Awor cu e camindanan ta habri lo sinti agilisacion den trafico. Ta gradici comunidad pa e pasenshi cu comunidad tabatin durante e periodo di ehecucion di e proyecto.
