Dialuna Prome Minister Evelyn Wever-Croes a ricibi y reuni cu representante di UNDP den nos region, sra. Randi Davis kende ta na Aruba cu e proposito pa presenta su credencialnan na Gobierno di Aruba como e representante nobo di UNDP pa Trinidad & Tobago, Aruba, Corsou y Sint Maarten. Sra. Davis a cuminsa su cargo nobo desde 5 di october ultimo. Sra. Davis a wordo compaña pa su asistente, Sra. Sharifa Ali-Abdullah.
Aruba tin un relacion estrecho cu Nacionnan Uni y ta hayando reconocimento pa nos vision y prioridad riba tereno di integridad y combatimento di corupcion, institutonan fuerte, innovacion y e-Government, maneho pa desaroyo y proteccion di hende muhe. Tur den cuadro di e Metanan di Desaroyo Sostenible, SDG’s y no laga ningun hende atras.
Prome Minister den reunion cu UNDP luna pasa durante e Asamblea General di Nacionnan Uni, a yega na palabracionnan cu UNDP lo bay yuda Aruba pa fortifica institutonan pa crea un fundeshi solido di bon gobernacion y di integridad. Na mes momento tambe, lo yuda Aruba implementa su vision di innovacion y e-Government pa trece e transparencia cu ta necesario pa logra bon gobernacion den tur sentido di palabra.
“Esakinan tawata palabracionnan concreto y hopi importante pa yuda nos pais sigui bay padilanti y desaroya y sigui implementa e vision di integridad y e vision di innovacion. Y awe, esaki a keda confirma pa sra. Randi Davis. Den nomber di Gobierno di Aruba y di pueblo di Aruba, mi ta gradici Sra. Davis y UNDP pa reconoce nos vision di maneho pa pone e ser humano central”, Prome Minister a expresa.