Parlamentario Endy Croes ta refuta di ta contento cu Parlamento a logra baha Benny “Avestruz” Sevinger fo’i avion. Manera a vocifera siman pasa cu Benny manera “Serafina den jet” a pidi Parlamento pa cumpra su ticket pa Panama unda e lo kier representa Parlamento durante reunion di Parlatino. Hunto cu Robert Candelaria nan a laga book 2 ticket den business class na balor di alrededor 3000 florin pa cada un. Parlamentario Endy Croes cu ta riba mesun vuelo aki esta 7 di november tabata tin un ticket den economy class di 800 florin. Momento cu Croes a tuma nota di e abuso di Benny y cu nan ta riba mesun buelo el a tuma e decision cu e no ta biaha cu un “sospechoso” cu 5 cargo riba su cabes, mas aun e “sospechoso” cu un ticket den business class.
Parlamento a baha Benny fo’i avion
Parlamentario Endy Croes a manda un carta y pidi Parlamento pa deshaci di su ticket y e no lo biaha mas. Alabes Parlamentario Endy Croes a manda carta pa Presidente di parlamento Sr. Juan Ady Thijsen y Lider di Fraccion di MEP Sr. Rocco Tjon cu peticion pa trata e abuso aki den CHA ( Commissie Huishoudelijke Aangelegenheden). Esaki a tuma lugar diahuebs ultimo di cual a sali un conseho pa Comision Central. Diabierna ultimo a trata e asunto aki den sala di Parlamento durante Comision Central unda tanto MEP y POR a vota na fabor pa stop Benny di biaha y baha Benny fo’i avion kitando su ticket y daggeldvergoeding for di dje como cu no ta normal cu un sospechoso ta representa Parlamento pero esaki no ta normal den ningun compania tampoco.
Mester debolbe placa di e biahe
AVP a protesta energicamente y ta haya cu ta masha normal pa Benny – aunke sea sospechoso – por biaha den business class cu un ticket di 3000 florin pa representa Parlamento dignamente. RED tambe a duna AVP rason riba e topico aki. Finalmente decision a cay cu Benny no por biaha y lo kita su ticket for di dje y e mester debolbe su placa di daggeldvergoeding y esaki lo keda vigente te dia cu e no tin cargo mas riba dje cual porcierto nos ta mira y anticipa cu esey lo ta un asunto hopi complica,
Parlamentario Croes ta termina bisando: Si Benny kier biaha, e biaha cu su placa of placa di Partido AVP pero no cu placa di pueblo.