“Pa Gabinete Wever-Croes e ser humano ta central”, esaki ta palabranan di Minister di Enseñansa Sr. Rudy Lampe a expresa na momento cu el a anuncia durante un conferencia di prensa e grato noticia di e decision pa baha e interes di e Aruba lening na 0%. Esaki ta un decision cu a ser tuma den Conseho di Minister y aproba pa bin na vigor entrante 1 di januari 2020.
E ley aki lo ta aplicabel pa esnan cu ya caba tin un acuerdo firma cu Aruba y pa esnan cu ta bay pidi un prestamo den futuro. Aruba lo ofrece e fiansa aki na un interes di 0% haciendo esaki mas facil pa nos studiantenan por paga bek una bes nan caba di studia. Esaki sigur ta un bon noticia pa e comunidad di Aruba pero en especial pa esnan cu pa añanan caba ta luchando pa por caba di paga e lening aki.
E decision aki a wordo tuma mirando cu Gabinete Wever-Croes ta considera estudio un parti esencial pa progreso di pais Aruba y bahando e interes di e Aruba lening pa 0% ta stimula nos hobennan mas ainda pa kier sigui studia ya cu na momento cu nan caba nan estudio e lening aki por wordo paga mas lihe. Esaki sigur ta wordo considera como un inversion den enseñana di Aruba y Gobierno ta spera cu tumando e decision aki por conduci na trece mas profesionalnan Arubano pa bin contribui na e economia di pais Aruba.
