Parlamentario Endy Croes desde dialuna durante conferencia di prensa semanal di Fraccion di MEP a trece su opinion y desgusto padilanti. Segun Parlamentario Croes, su persona ta totalmente den desacuerdo cu Parlamento mester paga pa Benny “Avestruz” Sevinger mester biaha pa Panama pa reunionnan di Parlatino representando Staten y Aruba for 7 pa 9 di november proximo. Parlamentario Endy Croes tambe tabata programa riba e mesun buelo aki. Parlamentario Croes a pidi Parlamento pa cumpra su ticket den economy class cual ta entre 800 pa 900 florin.
Fiesta cu placa di pueblo
Momento cu Parlamentario Croes a tuma nota cu tanto Benny Sevinger como Robert Candelaria nan ticket ta cumpra pa nan biaha pa Panama den business class na balor di rond 3000 florin pa cada ticket mas aun e sentimento di abuso ta lanta den su persona primordialmente pa hendenan cu a desgracia e pais aki financieramente y ainda kier sigui fiesta cu placa di pueblo. Mesora Parlamentario Croes a avisa Parlamento cu e no lo biaha mas pero a manda un carta pidiendo atencion di CHA ( Commissie Huishoudelijke Aangelegenheden) pa trata e caso aki y duna respet y honor na Parlamento caminda cu ningun Parlamentario sospechoso por ricibi beneficio manera ticket y daggeldvergoeding pa representa Parlamento.
Paga for di propio saco
Fraccion di MEP den su mayoria a para hunto pa e pensamento aki reflehando integridad. Parlamentario Croes a compronde cu CHA a trata su peticion diahuebs y lo duna un conseho pa diabierna atardi trata e resultado di CHA den Comision Central pa un decision final. Den contexto di Comision Central, un miembro di cada Fraccion por representa ful su Fraccion. Por ehempel Rocco Tjon den nomber di MEP ta representa (9), esta e mayoria di MEP y un miembro di POR ta representa (2) y RED cu 1 miembro ta forma 12. Normalmente cu 11 esaki lo pasa y si logra esaki lo baha Benny mesora for di avion. Of si Benny kier biaha e por paga esaki for di su propio saco.
Benny, keda bo cas!
Tin algun Parlamentario di AVP ta cana cu e pensamento eroneo cu bo no por para un biahamento den un reunion di Comision Central sino mester ancra esaki den Ley of den Reglament van Orde. Parlamentario Endy Croes lo reta tur e parlamentarionan di AVP pa bin pafo y bin splica pueblo boso pensamento eroneo despues di a desgracia e pais aki financieramente y ainda kier purba djo djo. Si bo ta sospechoso bo no tin derecho pa biaha representa ningun pais. Keda bo cas! Manera e mucha jongnan ta bisa. “Haci drechi”! Dialuna lo publica tur e nombernan di AVP cu a vota Pro pa Benny biaha pero Croes ta kere firme cu mayoria cu No ta AVP lo vota contra y asina logra baha Benny for di avion!
