Diabierna mainta Parlamento di Aruba a aproba unanimamente e ley pa 512 persona por cumpra nan cas conoci den boca di pueblo como “Cas di Pueblo”, ubica den diferente bario rond Aruba.
Parlamentario di POR, Alan Howell ta masha contento cu despues di tanto aña finalmente e ley aki a bin cu ta permiti famianan por cumpra nan cas.
Despues di e reunion el a expresa cu “Un di e metanan cu mi a bringa duro pa logra na momento cu mi a drenta Parlamento y bira vice presidente di Parlamento ta esaki. Ciudadanonan wardando fo’i 1995, awo tin e oportunidad pa cumpra nan mesun cas. Un soño di hopi cu awe ta bira realidad”.
E barionan unda e casnan aki ta ubica ta Brazil/Mabon, Village, Esso Heights, Pos Chiquito, Rooi Congo, Resedastraat, Louise de Cologny Straat, Maria v Oranjestraat, Savaneta, Cas Paloma, Sero Tijshi, Canashito, Sabana Blanco, Dakota, Tarabana, Madiki, Jaburibari, Noord entre otro. Pa mas informacion esnan interesa por tuma contacto cu FCCA.
Finalisando Howell a gracidi Minister Otmar Oduber y FCCA pa haci e meta aki bira un realidad. “Pabien!”