Oranjestad, despues cu un grupo di hurado tawatin e difisil tarea pa pasa door di e nombernan ricibi, nos hurado a logra saca 11 nomber cu ta cumpli cu tur e reglanan di International Astronomical Union (IAU). Por vota pa e nombernan te cu 12 di November 2019.
Space and Nature Aruba Foundation (SNAF) ta content con e proceso di seleccion a bai, bou guia di Marian Abath (Artista di Glas), Raymundo Dijkhof (Argeoloog), Maritsa Everon (experto den lenguahe Papiamento) y Harold Kelly (Argeoloog). E grupo di experto aki tawatin e tarea basta difisil pa selecciona e miho nombernan cu ta cumpli cu e reglanan di IAU. E nombernan y nan splicacion por ser haña riba nos website http://www.spacenaturearuba.com/exoplanet-naming-competition-2019/
Ta pidi encaresidamente pa lesa e splicacionan bon y selecta esun cu bo ta sinti cu ta esun cu por representa Aruba mas miho cu ta posibel, paso esaki lo ta e nomber cu lo wordo uza pa e strea y su exoplaneta WASP-39 y WASP 39b.
IAU lo anuncia e nombernan ganadornan di tur e 128 paisnan cu a participa fin di December 2019 y SNAF lo anuncia e ganadornan di Prome Segundo y Tercer lugar dia 18 di Januari 2020.
Pa mas informacion tocante Astronomia y Naturalesa, sigi nos Facebook page Space and Nature Aruba