Kralendijk – Durante e convencion di Dutch Caribbean Nature Alliance (DCNA) di e aña aki cu a tuma luga recientemente na Bonaire, biologonan di nos region a topa pa papia riba diferente topico: restauracion di coral, Plan di Accion pa Coral, e plataforma cientifico Observation.org y e proximo peticion pa proposicionnan di investigacion cientifico di e Organisacion Hulandes pa Investigacion Cientifico (NWO). Banda di tabata presente na e presentacionnan y e workshopnan, e biologonan di, entre otro, e seis parkenan nacional di Caribe Hulandes a participa na un excursion durante cua nan por a mira e trabounan di restauracion di coral di Reef Renewal Foundation na Bonaire cu nan propio wowo.
Informacion detaya tocante rescate di coral E biologonan di e parkenan ta dispone awor di miho informacion tocante ki ora y con pa aplica metodonan di restauracion di coral. Esaki danki na e echo cu e presentacionnan y workshopnan a brinda un oportunidad unico pa siña di otro su conocemento y experiencia. E conocemento nobo cu e biologonan a kaba di adkiri sigur lo ta di beneficio pa e trabounan haci na e otro islanan. “Ta hopi
inspirativo pa mira kico ya caba ta haciendo na Bonaire y pa siña di e experiencianan di e otro islanan. Tabata bon tambe pa haya sa ki tipo di conocemento ta disponibel y con ta hasi esaki disponibel pa medio di metodologianan desaroya.” Jessica Berkel di STENAPA (St. Eustatius) a comenta.
Charla ta laga sentimentonan mixto atras cerca participantenan E charla pa publico a causa sentimentonan mixto cerca esnan cu tabata presente. Basa riba standardnan cientifico, e status di rifnan di coral den Caribe Hulandes ta modera pa desfaborabel. Esaki ta nifica cu mester tuma medidanan urgente. E concideracion principal ta cu status di e rifnan di coral ta crucial pa e prosperidad duradero di e islanan riba termino largo. P’esei e forsa di boluntad pa tuma accion y preveni cu nos rifnan di coral ta bai atras mas tanto ta hopi fuerte na e momentonan aki. Den e añanan benidero DCNA lo enfoca riba rescate di coral tambe.
Pueblo por yuda raporta especienan di animal y mata Hans Verdaat a presenta con organisacionnan pa conservacion di naturalesa den Caribe Hulandes por hasi uzo di e website dutchcaribbean.observation.org y appnan corespondiente. E website y appnan gratis aki ta sirbi no solamente biologonan, pero tambe pueblo en general pa por raporta animal y matanan. Ademas, tantu e site como e aplicacionnan ta disponibel na mas cu 40 idioma. Actualmente ta den e proceso pa tradusi e site na Papiamentu. Ora cu comunidadnan local raporta riba especienan, e organisacionnan pa conservacion di naturalesa ta haya acceso na un fuente di conocemento sumamente util. Ademas e informacion aki ta contribui cu proteccion di e especienan raporta. Pa mas informacion por tuma contacto ku DCNA na [email protected].
Explorando posibilidadnan pa colaboracion entre e islanan Arjan de Groene di World Wildlife Fund (WWF-NL) a duna un workshop tocante e Plan di Maneho pa Naturalesa, incluyendo e Plan di Accion pa Coral cu actualmente ta desaroyando pa islanan BES. E workshop a brinda un plataforma valioso pa participantenan duna input riba con pa implementa e plan aki exitosamente. Aruba, Corsou y St. Maarten tambe por a duna input riba posibel colaboracion entre e seis islanan den futuro.
Optimalisando proyectonan di investigacion nobo Joseph Stuefer y Niels van den Berg di NWO a duna un update riba e proximo peticion pa proposicionnan di investigacion cientifico den Caribe Hulandes. E workshop aki tambe tabata un oportunidad unico pa papia tocante e acercamento desea y resultadonan di proyectonan di investigacion, pa medio di cua por mehora maneho di parkenan y proteha area y animalnan vulnerabel.
Pa mas informacion por fabor tuma contacto ku DCNA na (+599) 717-5010 of [email protected]