Nos ta yegando fin di aña atrobe i manera ta e eksperensia ku otro añanan, kasonan di atrako tin tendensia di ta oumentá. Esaki, no opstante di e esfuerso ku Kuerpo Polisial ta hasi pa detené atrakadónan i solushoná mas tantu kaso posibel. Pa e luna di òktober aki so, un total di 25 detenshon pa ku atrako a keda realisá ku a trese kuné ku un kantidat di kaso a keda solushoná. Sinembargo, atrakonan ta sigui tuma lugá i for di análisis por konkluí ku esaki ta sosodé tantu dor di residivistanan pero tambe personanan ku anteriormente no a bini den kontakto ku polis òf ku hustisia.
Den kuadro di e responsabilidat ku polis tin pa konsientisá komunidat kon prevení mihó, ta sigui aki algun tep, pa yuda abo komo siudadano ku ta trafiká na pia, evitá òf minimalisá e posibilidat di bira víktima di kaso di atrako.
• Evitá di kana anochi bo so riba kaya i sigur den áreanan ku poko iluminashon. Preferibel ta den kompania di un òf mas persona.
• Kana ku konfiansa,determinashon i pasonan firme pa bo yega bo destinashon un bes;
• Kana semper ku kara pa e tráfiko ku ta bin for di direkshon kontrario. Malechornan ta ataka un persona ku ta kana ku lomba pa tráfiko mas fásil.
• Bisti sapatu i paña ku bo por move fásil den dje, i tambe pa si eventualmente bo mester kore. Evitá di kana ku hopi saku i pakete. E ta bira atraktivo pa e atrakadó.
• Pone èkstra atenshon si bo mester pasa banda di mondi, kas bandoná ets. Malechornan por skonde ei den warda bo pasa.
• Laga un famia òf konosí sa ki ora bo a sali fo’i unda, ku kua destinashon i kua ruta bo ta usa.
• No tuma left serka hende ku bo no konosé.
• No para papia ku hende ku bo no konosé, sigur den oranan di anochi.
SIRBI I PROTEHÁ
Departamentu di Komunikashon i Prevenshon Página 1
• Sea semper alerta! Na momentu ku bo ta kana, wak rònt di bo. Si e atrakadó nota ku bo ta alerta, bo no ta bira un opheto interesante mas p’e.
• Si bo mester hasi uso di transporte públiko ku ta pasa na oranan stipulá (manera konvoi), no bai sinta den oranan di anochi muchu adelantá na bòrchi di bus.
• Hende muhé mester evitá di kana ku kartera di kua e man ta muchu largu. Di e forma ei bo tin ménos kontrol riba bo tas.
• No kana ku hopi prenda bistí i no laga kosnan di balor ta bisto pa e atrakadó.
• Evitá mas tantu posibel di usa e mesun ruta i si por, laga un hende di kas bin kontra bo na mitar di kaminda, si ta bo so ta yegando kas anochi.
• Si bo nota kualke situashon sospechoso yama 917 i den kaso di emergensia yama 911.