ORANJESTAD, Aruba: Pa un mucha por crece y desaroya sano ta nesesario pa bou 5 aña e mucha pasa menos tempo posibel inactivo y mas tempo hungando. Tambe ta hopi importante pa un mucha drumi bon 8 ora of mas. Esaki segun e instruccionnan nobo publica door di ‘World Health Organization’ (WHO).
Crea un patronchi di 24 ora di actividad general ta e clave: Reemplasa ‘screen-time’ pa un wega mas activo, mientras bo ta sigur cu e muchanan chikito ta drumi suficiente y bon. E tempo di relaha no basa riba ‘screen-time’ pero manera lesa un buki, conta un storia, canta y/of traha puzzel, ta hopi importante pa e desaroyo di un mucha.
Mucha (3 pa 4 aña) mester:
Pasa minimo 180 minuut pa dia haciendo un variedad di actividadnan fisico, di cual minimo 60 minuut mester ta un actividad cu ta rekeri tiki pa hopi movecion y cu ta wordo extendi durante full e dia. Mas actividad ta miho. Evita di laga un mucha keda sinta mas cu 1 ora mes un caminda por ehempel den un ‘stroller’, ‘highchair’, ‘carseat’. Screen-time por pero no mester ta mas cu 1 ora. Menos ta miho.
Ta recomenda pa mucha di 3 pa 4 aña tin entra 10 pa 13 ora di bon soño, incluso siesta.
“Loke realmente nos mester haci ta trece bek hungamento pa muchanan”, dr. Juana Willumsen coordinador di e seccion di obesidad infantil y actividad fisico di WHO, ta bisa. Ta trata akinan di haci e cambio den pasa tempo sinta y no activo cu tempo pa hunga, protehando e momento di drumi.
Door di aplica e recomendacionnan duna, durante e prome 5 añanan di bida di un mucha lo contribui na e desaroyo motorico, cognitivo y na salud di e muchanan pa bida largo.