Tira sushi riba caminda publico no ta wordo permiti y mucho menos tira un botter di cerbes riba un auto biniendo di direccion contrario, esaki sigur por a causa accidente serio.
Boegoeroei: Diabierna den oranan di marduga un patruya di polis a wordo manda cu urgencia riba e caminda principal di Noord, un poco pazuid di Misa Santa Anna, pa motibo cu un pareha a wordo herida na momento cu un persona for di un auto di direccion contrario a manda un botter riba e auto di e pareha, e botter a dal riba e windshield, kibra esaki y e glas cu a bay paden a herida e pareha den e auto.
Na yegada polis enberdad a bin topa cu un yaris blanco y dos persona herida, na e sitio e pareha a splica polis cu nan tabata bayendo direccion zuid y diripiente un persona for di un auto cu tabata biniendo di direccion contrario lo a manda nan auto cu un botter di cerbes. E botter a dal hopi duro contra e windshield, te cu ela kibra esaki y e pidanan di glas a drenta den e auto, a herida e chauffeur y e ocupante, nan tabata tin varios corta y tabata sangrando hopi.
Polis na e sitio mesora a pidi pa presencia di ambulance, despues cu personal di ambulance a trata cu e dos victimanan na e sitio a transporta ambos pa hospital pa un tratamento medico mas avansa.
