Habaai, Korsou: Djaweps 24 di òktober 2019 alrededor di 18.10 or, Sentral di Polis a risibí notifikashon di un kaso di eksploshon ku a tuma lugá den un kas den área di Habaai i ku tin un persona heridá. Mesora a dirigí unidat polisial na e sitio.
Na yegada di e unidat, polis a en kontra ku un dama di 40 aña di edat ku tabatin kemadura na su kara i na e parti drechi di su kurpa. For di un investigashon preliminar ku polis a realisa na e sitio, polis a komprondé di bisiña ku nan a tende un eksploshon i na momentu ku nan a dirigí nan mes pa e kas, nan a topa ku e dama habitante di e kas drumí abou dilanti di un stof ku kemadura na su kurpa.
E kas kompleto a risibí hopi daño material i tambe un vehíkulo ku tabata stashoná den kura di e kas. Ambulans a presentá na e sitio i a transportá e dama pa poliklínika di SEHOS pa tratamentu médiko mas avansa. Kousa di e eksploshon te na e momentunan aki ta deskonosí i ta den investigashon.
