Melvin Tromp: Como maestro di scol Edgar Vrolijk a tuma indexering Awe como parlamentario ta pidi maestronan pa compronde cu no tin placa

Melvin Tromp di partido AVP ta mustra cu partido MEP su politiconan, no ta laga nan mal mayanan para un banda y hasta e supuesto grupo di politiconan nobo di e partido, ta sigui insisti riba e vision di e partido, esta cu nan mes y famia y amigonan, ta bin na prome luga y despues pueblo ta wordo considera.
Segun sr Tromp ta un hipocrecia total pa scucha Parlamentario Edgar Vrolijk den forma contundente bisa maestronan, su coleganan den enseñansa, cu nan tin cu stop di haci fastioso y stop di insisti pa haya indexering, ya cu segun Vrolijk no tin placa riba presupuesto pa esaki.
“Hendenan cu a drenta parlamento riba promesanan falso haci na pueblo, hendenan cu a grita c’un era nobo ta inicia pero awor ta resulta cu mesun vision bieu, mesun pensamento politico anticua di e partido MEP, ta sigui reina cerca mayoria di nan.
E mesun parlamentario Vrolijk aki, ta un di esunnan cu cosnan a cambia ora cu e hiba palabra durante di reunionnan publico pero pueblo ya caba a realisa cu nada a cambia, pero al contrario cosnan a bira pio bou di e gobierno cu e parlamentario aki ta sostene.
Awor di repente no tin placa pa indexering, no tin placa pa trahadonan publico haya pa cubri gasto di inflacion crea pa gabinete Wever Croes pero segun Vrolijk aki, maestronan kendenan tabata pa basta aña su coleganan, tin cu compronde cu e situacion no ta permiti pa gobierno duna nan loke nan ta pidi.
Vrolijk no ta pidi reunion cu gobierno pa exigi pa gobierno corta gastonan manera di biahamento caminda den dos aña di tempo, ministernan a gasta miyones pa biaha rond mundo, bishitando tur skina rond di hemisferio pero pa trahadonan publico, NO tin placa pa indexering.
Minister Otmar Oduber cu sosten di entre otro Edgar Vrolijk na inicio di gobernacion, a logra haya casi 10 miyon pa restauracion di un parti di edificio di gobierno, sin cu esaki tabata un prioridad pero pa trahadonan publico no tin mas 10 miyon pa indexering.
Mesun Minister aki a duna un sponsor di su partido, un contract di huur di 50 mil florin pa luna pero pa indexering no tin ningun cen preto y segun Vrolijk, maestronan, su ex coleganan tin cu compronde cu no tin placa.
E gobierno cu e ta sostene, a ranca den 2019 e suma di 270 miyon florin for di saca di pueblo, entre otro di e maestronan aki cu ta su coleganan pero segun Vrolijk di e suma aki no tin ningun debchi pa paga indexering di trahadonan publico.
Prome Minister Evelyn Wever Croes dia 8 di februari di 2018 den un conferencia di prensa a mustra cu el a logra di corta 8n miyon florinh di gasto, segun e prome minister, eliminando coordinadornan di Mike Eman, pero e suma aki unda el a bay cu ya no tin ningun cen preto pa maestronan haya indexering.
Minister di Enseñansa ta cortando gasto den tur sector di enseñansa y ta algo cu e mandatario aki mes a splica cu mester haci pero e placa aki cu ta wordo gespaar riba custia di maestronan, no ta sirbi pa paga nan indexering?
Pero aki por mira personificacion di e mentalidad di un partido MEP cu nunca a goberna pa pueblo, nunca a pone pueblo dilanti prome cu tur cos, pero si a percura pa nan hendenan haya tur cos, nan sostenedonan wordo bon sirbi y nan sponsornan haya tur loke nan pidi for di e gobierno aki pero pa maestronan y otro funcionarionan publico, simplemente no tin placa y nan tin cu warda.
Ora cu scucha un parlamentario cu a sostene e pakete di medida di gabinete Wever Croes awor ta papia cu no tin placa y kende kier trata di hustifica e abusonan aki cu su gobiernot a cometiendo contra pueblo di Aruba, simplemente no merece di ta un representante di pueblo,” Melvin Tromp a declara.