Willemstad, Korsou: Djárason 23 di òktober 2019 alrededor di 01.10’or di mardugá, Sentral di Polis a risibí notifikashon di un kaso di hinkamentu ku a tuma lugá den área di Saliña na altura di un trùk di pan.
Mesora a dirigí un unidat na e sitio i na su yegada, polis a topa ku un hòmber ku un hinká i tabata sangrando bastante. Ambulans ku a presentá na e sitio, a transportá e hòmber víktima pa poliklínika di SEHOS pa tratamentu médiko. For di investigashon ku polis a realisá na e sitio a resultá ku tabatin un diskushon entre dos hòmber tokante pagamentu pa transportá e víktima pa un sitio.
E hòmber víktima a purba pa bai ku e outo di e sospechoso i a aksidentá ku esaki. Despues a surgí un bringamentu entre dos hòmbernan aki ku a terminá den un hinkamentu ku un bòter kibra na altura di e víktima su orea. Despues di e akto e hòmber sospechoso a bai for di e sitio.
Kontinuando ku un búskeda den e área, a bin detené e sospechoso, L.D.D.C.C., di 38 aña di edat, nasé Kòrsou mas despues, komo sospechoso den e kaso ariba menshoná. Na e sitio polis a konfiská un outo pa mas investigashon. Investigashon den e kaso aki ta kontinuá.