ORANJESTAD, Aruba – Recientemente Aruba Tourism Authority y Riu Palace Aruba, a honra dos pareha for di New Jersey, cu pa hopi tempo caba ta biniendo Aruba. Nan ta considera Aruba nan cas, leu for di cas.
Ta trata aki di Robert y Patricia Lorentzen y Anthony y Mary Ann Polardo. E parehanan aki a conoce otro den e restaurant na Riu Palace Aruba 12 aña pasa y desde e tempo ey a bira manera un famia.
Nan ta biaha hunto y bay ariba barco hunto y rond di mundo. Tur nan vakantie nan ta pase hunto y henter nan famia a conoce otro. Tur esaki danki na nan biahe pa Aruba.
Durante di un ceremonia chikito, ATA, hunto cu Riu Palace Aruba, a reconoce e pareha aki pa nan añanan cu nan ta bin Aruba.
Robert y Patricia Lorentzen ta biniendo Aruba pa 10 aña largo y nan a ricibi nan certificado como Bishitante Distingui.
Anthony y Mary Ann Polardo, tin hopi mas aña biniendo Aruba. Ta pa e motibo aki tambe nan a ricibi nan certificado como Embahadonan di Bon Boluntad, debi cu nan ta biniendo Aruba pa 20 aña caba.
Ambos pareha a gradici ATA y Riu Palace Aruba pa organisa e bunita ceremonia chikito pa nan celebracion.
Nan cada un a haya un pin di Aruba y nan a haya “license plate covers” cu ta scirbi One Happy Island Aruba pa nan por pone ariba nan auto na Merca.
Maria Dominguez General Manager di Riu Palace Aruba tabata presente y a duna palabra di gradecimento na e dos parehanan aki pa keda bishita Aruba fielmente pa asina hopi aña y pa scoge Riu Palace Aruba como nan di dos cas tur e añanan aki.
Sandra Ospina kende ta e Public Relations Manager di Riu Palace Aruba tambe tabata presente pa e ocasion special aki.
Kimberly Richardson, funcionario di ATA, a entrega e certificado na ambos pareha. Un palabra di felicitacion ta bay na tanto pareha Lorentzen como pareha Polardo, pa nan añanan cu nan ta bishita Aruba fielmente y pa nan sigui scoge Aruba como nan cas leu for di cas.