Ni cu cuanto programa di conscientisacion, toch tur dia tin chauffeurnan cu ta subi tras di stuur despues di a cunsumi alcohol, formando asina un peliger no solamente pa nan bida pero pa tur otro cu tambe ta traficando riba e camindanan di Aruba.
Tanki Leendert: Diasabra den oranan di marduga polis ta bay atende cu un accidente cu a tuma lugar riba e caminda di Tanki Leendert un poco mas pabou di e rotonde Tanki Leendert, un auto a dal contra un palo di luz.
Algun persona cu tabata na Centro di Bario Tanki Leendert a scucha un impacto fuerte y a core bay mira kiko a pasa, y a bin topa cu un Toyota Yaris blanco cu a dal contra un palo di luz, a kibre y tur e wayanana tabata colga na vloer y tabata spart candela, mesora nan a avisa polis.
Mientras nan tabata wardando riba polis, e chauffeur di e Yaris Blanco kier a bandona e sitio, e la trata varios biaha pa start e auto, pa asina bay for di e sitio, pero debi na e impacto fuerte, e auto a haya hopi daño material y no por a core mas.
Na yegada polis a bin compronde cu e chauffeur tabata biniendo di p’ariba, pa un of otro motibo a baha caminda, a dal contra e palo di luz, a kibra esaki.
E agentenan na e sitio a nota cu e chauffeur tabata bou influencia y a haci test di alcohol cu ne, despues cu ela supla, polis a detene y a transporte pa warda di polis.
Polis na e sitio mesora a pidi pa presencia di Elmar mirando cu e wayanan tabata spart candela y tambe a pidi pa un takelwagen pa transporta e auto pa warda di Balashi.