Diabierna mainta na Directie Luchtvaart a tuma luga e firmament di un permiso pa Aruba Airlines mes por opera y maneha e tipo nobo di avion CRJ-200. Den e ultimo lunanan e tipo di avion aki tabata wordo opera pa un compania Canades, cual tabata realisa vuelonan entre e islanan Aruba, Corsou y Boneiro. Mientrastanto, Aruba Airlines tabata den preparacion, hunto cu Directie Luchtvaart, pa haya e certificacion y aprobacion pa nan mes por opera e tipo di avion aki.
E proceso di certificacion tabata hopi extenso y a dura varios luna, cual ta encera, entre otro, e proceso pa desaroya y aproba manualnan, proceduranan, checklists, dunamento di training, inspeccionnan di e compania, e avion y su procesonan y tambe vuelonan di demonstracion. Na final di tur esaki Aruba Airlines a sa di demonstra cu e ta cumpli cu e tur e rekisitonan cu Directie Luchtvaart ta exigi (basa riba e reglanan internacional di ICAO), y awor Aruba Airlines por bula e avion cu nan mes un pilotonan y mantene esaki cu nan propio mecaniconan.
Minister Chris Romero, como titular di e cartera di Transporte, ta gradici e profesionalnan di Directie Luchtvaart pa e trabou desplega y na mes momento ta felicita Aruba Airlines cu e logro grandi aki. Ta spera cu esaki lo ta un cuminsamento pa expande e flota di CRJ-200 y tambe cu lo bin destinacionnan nobo.
