Kralendijk – E konvenshon benidero di Dutch Caribbean Nature Alliance (DCNA) ta tuma lugá na Boneiru e aña aki i lo enfoká riba partisipashon di hubentut, maneho di parkenan marino, restourashon di koral, investigashon sientífiko i planifikashon. Tur seis organisashon pa maneho di parke nashonal di e islanan ku ta forma parti di Reino Hulandes den Karibe, aktornan klave i otro gruponan di interes lokal ta uniendo forsa pa huntu fortifiká polítikanan pa maneho stratégiko di naturalesa pa e añanan ku ta bini. Tambe lo asistí na e simposio World Wildlife Fund Hulanda (WWF- NL), Vogelbescherming Nederland, International Union for Conservation of Nature (IUCN-NL), Nederlandse Organisatie voor Wetenschappelijk Onderzoek i sientífikonan eksperto den restourashon di koral di Wageningen University & Research i Reef Renewal Foundation Bonaire. Di otro banda lo trese diferente hóben di e islanan huntu pa siña tokante otro su aktividatnan pa konservashon di naturalesa riba kada un su respektivo isla. Ademas lo tin un charla grátis pa públiko tokante refnan di koral dia 28 di òktober pa 7:30 pm na Captain Don’s Hotel, Bonaire.
Kolaborashon ta esensial Un aserkamentu konhunto pa atendé ku retonan di konservashon komun na e seis islanan lo benefisiá protekshon di naturalesa den e área Karibense di Reino Hulandes en grande. E organisashonnan pa maneho di parke di tur seis isla ta mas fuerte ora nan ta huntu, ku ora nan ta riba nan mes. Ademas, diferente organisashon Hulandes ta indiká ku nan mester di e parkenan pa alkansá nan metanan i pa implementá plannan konhunto pa mehora aktividatnan dirigí riba konservashon di naturalesa riba tur seis isla den Karibe ku ta forma parti di Reino Hulandes. Dutch Caribbean Nature Alliance (DCNA), huntu ku e organisashonnan invitá ke ekspandé, profeshonalisá i fortifiká e konosementu i eksperensia ku e parkenan tin aktualmente. Naturalmente tur loke ta bayendo bon por i mester bai mihó, ku bista riba e konsekuensianan serio di kambio di klima. Hopi desafio ku tur isla ta dal den dje por keda solushoná mihó den kolaborashon ku otro. Huntu nos por alkansá mas.
Partisipashon di hubentut Maneho di naturalesa na promé lugá ta enfoká riba benefisio i maneho di rekursonan natural pa futuro generashonnan. Durante e konvenshon di DCNA, ku lo keda organisá tur aña, lo dediká atenshon special na e programanan di naturalesa pa hubentut di e seis islanan. Di e programanan di Fundacion Parke Nashonal Aruba, STINAPA Bonaire, CARMABI na Kòrsou, Saba Conservation Foundation, Sint Maarten Nature Foundation i STENAPA na Sint Eustatius, a selektá kuater hoben pa kada isla i huntu nan lo asistí e konvenshon. Danki na kofinansiamentu di World Wide Fund for Nature, Rabobank i STINAPA, a prepará un programa ku ta dura henter un fin di siman i ku ta inkluí ekskurshon i workshop na Parke Nashonal Washington Slagbaai, kaminda e hóbennan lo pasa anochi. Lo ta un eksperensia úniko, kaminda nan lo tin e oportunidat pa siña tokante otro su naturalesa i asina logra un eksperensia memorabel. Nan lo kompletá nan programa ku un presentashon. E embahadornan hóben di naturalesa lo presentá nan propio konosementu i eksperensia i kon nan lo ke duna inisio na sierto akshonnan huntu ku nan respektivo organisashon lokal na e isla ku nan kada un ta representá.
Planifikashon stratégiko E partnernan i otro stakeholdernan di DCNA den Karibe hopi biaha tin metanan similar of metanan ku ta konektá ku otro. Durante e diferente workshopnan bou di e tema planifikashon stratégiko, e organisashonnan partisipante lo traha riba plannan konkreto i repartishon di tarea spesífiko pa asina hasi máksimo uzo di e sosten pa esfuersonan pa konservashon dirigí. WWF-NL, Vogelbescherming Nederland, IUCN-NL i DCNA lo bini huntu pues den e konteksto aki.
Workshop tokante koral pa biólogo Komo parti di un plan di akshon ku pronto lo keda publiká i e trabou pa restourashon di koral ku aktualmente e seis islanan ta hasiendo, lo tin un dia spesial ku charla, workshop, ekskurshon pa e biólogonan asosiá ku e áreanan protehá na e islanan. Ademas, e Organisashon Hulandes pa Investigashon Sientífiko lo tei presente i lo fasilitá un workshop tokante proposishonnan pa investigashon sientífiko ku próksimamente lo keda solisitá.
Charla grátis tokante ref di koral Pa kualke persona ku ta interesá den i komprometé ku status di refnan di koral na Bonaire i ku lo ke topa ku e ekspertonan regional personalmente, lo tin un charla grátis duna pa dr. Erik Meesters di Wageningen University & Research riba djaluna 28 di òktober di 7:30 PM pa 8:30 PM na Captain Don’s hotel, Bonaire.
Kuater tema, un konvenshon E kuater temanan menshoná ta forma e liña kòrá di e konvenshon. Huntu nos lo hasi di e konvenshon aki un éksito grandi, loke na su turno lo representá e punto di salida pa un fase nobo den maneho di naturalesa den Karibe.