Ministerio Publico na Hulanda a exigi 16 aña di castigo di prison y TBS pa un homber cu ta wordo sospecha di a mata su mesun mama. E homber lo a mata su mama pa motibo di un debe cu e tabata tin cu su mama y e placa aki ela gasta den wega di placa (gamble) door cu e tin e bisio aki y asina ela crea un debe di 40 mil cerca su mama.
Delft, Hulanda: Riba 23 di september 2018, e señora Mona Baartmans di 79 aña a wordo mira pa ultimo biaha na bida den compania di su yiu homber Ton L.
Riba e diadomingo aki su yiu homber Ton L. di 61 aña a pasa buske na cas, nan a bay hunto den auto na un cas di cuido na Den Haag, pa asina bishita e segundo casa di Mona. Despues e sospechoso lo mester a hiba su mama bek na su cas na Delft, caminda elo mester a bahe na rand di un area caminda auto no por yega, cu ta cerca di unda su mama tabata biba.
E siguiente dia e señora cu ta haci limpi, a bati alarma na momento cu ela ripara cu Mona no a yega su cas. Mesora autoridad a cuminsa cu un buskeda rigoroso den e area unda e mama tabata biba. Polis a pidi pa tur hende cu tabata den e area aki caminda Ton lo mester a baha su mama, pa tur e hendenan aki meld na polis.
Na prome instante nan a pensa cu por ta ela cay den gracht, pero hopi liher via imagennan di camara a bin ripara cu e no ta aparece riba e grabacion, caminda cu si enberdad e yiu a bahe unda ela bisa cu ela baha su mama, e camaranan lo a capta e mama sigur. Tambe e yiu homber a duna declaracionnan diferente di unda ela baha su mama. Un siman despues di e desaparicion di Mona, e yiu homber Ton L a keda deteni pa ta envolvi den desaparicion di su mama.
Manera simannan y dianan tabata pasando e otro ruman homber Hans den su tristesa a cuminsa perde tur speransa y tabata bisa cu e ta kere cu su mama ta morto, paso su mama ta bebe pildo pa curason y si e no bebe e ta muri.
Mas despues a bin sali na cla cu e Ton L. a yega di lanta 40 mil Euro for di cuenta di su mama y a gamble full e cent. E mama a cobr’e e cent aki y ela dicidi como solucion pa no mester paga e debe, di mata su mesun mama. Ton L. a confesa cu ela mata su mama door di choke cu un tiewrap y despues a dere.
E curpa sin di bida di Mona a wordo haya den mondi na Heinenoord. Pronto Hues lo duna sentencia den e caso aki.