Lo enfoka riba solucionnan pa un desaroyo duradero den cuadro di e metanan di Nacionnan Uni pa 2030
Innovacion den nos tempo, ta importante pa tanto e crecemento economico y prosperidad di un pais. E ta e uzo di technologianan y ideanan nobo pa mehora y realisa producto servicio y procesonan nobo na beneficio di un sociedad. Mesun importante ta pa involve comunidad den desaroyonan innovativo di e pais.
E aña aki, Gobierno ta dedica e siman di 28 di october pa 1 di november como e Siman di Innovacion, ‘Immerse Aruba Innovation Week’. Immerse ta nos siman di innovacion na Aruba.
E siman aki lo dedica na trece dilanti proyectonan innovativo cu ta tumando luga na Aruba
E siman aki ta e resultado di colaboracion entre diferente organisacion cu a bini hunto y a coordina nan diferente eventonan pa crea un programa nacional. Pues e no ta un solo evento, pero diferente evento den e mesun siman, un kalender di evento comparti. Fundacion FUTURA lo coordina y publica e diferente eventonan cu lo bay tin.
Durante e siman aki, sector priva, NGO’s, sector publico, studiante, entrepreneurs y inversionista na Aruba lo bini hunto, pa asina tene discurso y workshops riba topiconan relaciona cu innovacion, creatividad y entrepreneurship.
E enfoke ta pa como comunidad bini hunto y comparti ideanan pa solucionnan pa un desaroyo duradero den cuadro di e metanan di Nacionnan Uni pa 2030, e Sustainable Development Goals.
Lo bay tin diferente proyecto durante e siman menciona cu lo wordo publica durente e siguiente dianan.
Prome Minister Evelyn Wever-Croes ta haci un invitacion na henter nos comunidad, pa participa na Siman di Innovacion, pa ta parti di e discuscusion di sostenibilidad y bishita e diferente eventonan cu lo tuma luga durante e siman aki rond di nos isla.
Siman di Innovacion ta habri pa tur hende participa. Por ehempel, un scol por participa door di organisa nan propio ora di Immerse durante Siman di Innovacion cu nan studiantenan y dedica na un topico di innovacion, creatividad y sostenebilidad. Por entrega informacionnan di e evento na FUTURA via nan Website of Facebook pa asina e evento wordo añadi na e Kalender di Evento di Immerse Aruba Innovation Week.
Pa mas informacion, por bishita e website immersearuba.org pa e programa y pa mas informacion di con por participa na siman di innovacion.