ORANJESTAD, Aruba: Cu nos hubentud den mente, Aruba Hotel & Tourism Association (AHATA) un biaha mas a contribui na e sector di enseñansa. CEO di AHATA Tisa LaSorte a splika cu e ta sumamente importante pa tin un bon educacion cu ta prepara nos hobennan pa drenta forsa laboral den futuro y hiba nos isla p’adilanti. Turismo ta e pilar economico di nos economia y AHATA ta mira e necesidad pa Aruba inverti den un bon nivel di enseñansa.
AHATA ta na altura cu tin diferente scol local cu tin necesidad pa material y a skohe pa e aña aki yuda e proyecto na John Wesley College situa na San Nicolas.
Awendia ta masha importante den educacion pa usa video pa capta atencion di e studiantenan. E scol tabata tin necesidad pa television den klas pa e docentenan por proyecta video y duna les di un manera mas actualisa.
Cu donacion di cinco television AHATA kier a contribui na hisa e nivel di educacion y na e desaroyo di e scol di MAVO. Directora Sra. Andriene Guillard a keda masha agradecido pa e donacion aki. Cu e televisionnan nobo e docente por proyecta materialnan visual pa henter e klas por wak. Di e forma aki ta yuda hisa entusiasmo di studiantenan y avansa e progreso den nan estudio.