Parlamentario Marlon Sneek: Tras di lomba di maestronan Minister ta lanta stichting nobo y tuma otro hendenan pa duna les

Fraccion di AVP despues di a entrega cinco peticion pa un reunion publico riba enseñansa, diabierna ultimo a entrega e di seis peticion na Presidente di Parlamento, segun lider di fraccion di AVP, sr Marlon Sneek.
Ningun di e cinco peticion di fraccion di AVP pa reunion publico a wordo honra y hunto cu esaki, maestronan di scol tambe a bin den accion dilanti di Parlamento, pidiendo Presidente Ady Thijssen pa yama un reunion publico pa atende cu e maneho di Minister di Enseñansa, Rudy Lampe.
“Loke a hala nos atencion di fraccion di AVP, ta cu nos ta wak cu cada bes Minister Rudy Lampe ta warda ora cu tin vacacion escolar aden, pa asina e haci cu cosnan straño.
Informacion cu nos a ricibi recientemente ta cu Minister Lampe ta lantando un stichting nobo cual stichting lo bay tuma over e rol cu OAO, esta Openbare Avond Onderwijs, cu ta percura pa nos hobennan haya un di dos chens.
Pa nan haya un oportunidad pa bira un carpinte, bira un mecanico, un koelmonteur y tur otro curso cu ta wordo duna y 48 maestro a keda warda minister su contesta di kico ta bay pasa cu nan.
Minister a bisa nan cu nan tin cu sinta combersa caminda minister a bin cu e pensamento di no work no pay, e kier paga contact uren, e kier paga e maestronan di scol pa cada lesuur cu nan mester duna.
E mandatario a bisa e maestronan cu ta bon y cu e ta bay pasa riba e documentonan y cu e lo laga nan sa kico ta kico.
Den e dianan aki di vacacion, e maestronan ta haya tende for di nan alumnonan, cu oficina di Minister Lampe, ta yamandonan directamente informandonan cu dialuna y diamars nan lo ta na enseñansa pa empleo y cu for di diaranson pa diabierna nan lo ta na EPB pa nan haya practicum.
Minister Lampe a bay rond, busca otro hendenan di sector priva y tambe den sector publico, pa bay duna les na e muchanan aki.
Hopi di e hendenan aki segun e maestronan, no tin pedagogiek, nan ta en berdad ingeniero pero nan no tin preparacion con pa duna les pero Minister ta coy e 48 maestronan pone nan un banda sin bisa nan nadam, yama e alumnonan bisando nan cu scol ta bay cuminsa cu otro maestronan.
Esaki ta otro locura mas cu nos ta mira di e Minister di Enseñansa y pa fraccion di AVP esaki ta inaceptabel y esaki ta bira e di seis biaha cu nos ta haci un apelacion pa un reunion publico y nos ta spera cu Presdente di Parlamento, duna oido na nos peticion y yama un reunion publico, ya cu ta imposibel cu tin tanto cos pasando den enseñansa.
Tin cu bisa cu e 12 parlamentarionan cu ta sostene gobierno, tambe ta complice di e situacion aki ya cu nan tambe ta haya e peticionnan pa reunionnan di fraccion di AVP y nan no ta haci net nada.
Nan no ta pidi Presidente pa yama e reunion publico aki cu Minister Lampe pa e por bin duna cuenta pa asina tur hende sa kico ta pasando caminda awor nos ta tende c’un otro stichting ta wordo lanta caminda bou di e stichting aki tur hende ta bay y ta nan ta dicidi.
Maestronan cu ta di OAA no a haya carta y no a ni haya contesta riba e situacion caminda tin un persona sinta eynan tumando nomber y nan a coy e lista for di e persona aki y a informa su persona via di un whatsapp cu e no ta na OAA mas y cu e por wel di bay un otro caminda.
Su sindicato a bisa su persona cu e por bay bek y nan a coy tur e documentonan cu nomber y informacion di alumnonan pa e stichting nobo y nan ta yama e alumnonan y informanan cu dialuna nan ta cuminsa bou di e stichting nobo cu dos localidad.
Un rato nan ta bay ta na Enseñansa pa Empleo y cu e parti di praktijk ta wordo duna nan EPB, pa nos otro locura caminda 48 maestro ta wardando un contesta y e minister ta hci cos tras di nan lomba y esaki pa fraccion di AVP esaki ta inaceptabel y nos kier pa e Minister bin duna cuenta.
E tin cu bin splica Parlamento kico ta su maneho pa tur hende por sa, ya cu awor nos ta hayando un avelancha di pregunta pero no por duna informacion ya cu Minister Lampe no kier bin reunion publico pa splica Parlamento kico e ta bay haci pa asina ora cu haya e tipo di preguntanan aki, como Parlamentario por contesta e maestronan aki.
Pa colmo e 12 miembronan di Parlamento cu ta sostene e minister aki y ta complice di e situacion aki, tampoco kier yame pa un reunion pa e bin duna cuenta, pues un situacion hopi serio y hopi delicado mes.
Maestronan a bin dilanti Parlamento, a pidi un reunion publico pa e Minister bin splica su maneho y caminda nan a mustra bon cla cu nan no tin confiansa den e mandatario aki, ya cu minister Lampe ta sinta den reunion cu nan, bisa nan algo y su dia despues ta haci algo otro.
Awe por mira atrobe cu Minister Lampe ta sinta cu e maestronan di avondleergang, mustranan riba su idea y el a wordo informa cu nan no ta kere den su ideanan y el a pidi tempo pa e bin cu otro solucion pero awor sin papia cu e maestronan, ta bira lanta un stichting nobo y busca otro hendenan pa duna les,” lider di fraccion di AVP, Marlon Sneek a trece dilanti.