Home » Lider di fraccion di AVP Marlon Sneek: Situacion alarmante den Enseñansa di pais Aruba

Lider di fraccion di AVP Marlon Sneek: Situacion alarmante den Enseñansa di pais Aruba

by Admin
0 comment 60 views

Minister Rudy Lampe a pone docentenan di OAA un banda y busca den sector priva y publico nan reemplasante!

Diabierna mainta un biaha mas fraccion di AVP tabata na Parlamento pa pidi/ urgi un reunion publico riba enseñansa. Marlon Sneek ta di opinion cu e situacion ta uno INACEPTABEL mirando cu a pidi 5 reunion caba y te dia di awe niun di nan a keda honra.

Banda di e situacion di tension pa un reunion, e maestronan mes a presenta dilanti portanan di Parlamento pa asina pidi un reunion publico sin haya oido di e mandatarionan. Locual cu si a hala fraccion di AVP su atencion pisa ta e hecho cu e Minister di Enseñansa oportunamente ta warda fechanan cercano na vacantie pa asina e implementa/ehecuta cambionan abrupto y cuestionabel.

Marlon Sneek ta conta cu informacion cu nan a ricibi ta indica cu Minister Rudy Lampe lo ta lantando un stichting nobo cu lo bay tuma e rol over di Openbare Avondleergangen Aruba (OAA). Un scol cu a brinda e oportunidad na hopi studiante un segundo oportunidad den nan estudio y caminda hopi funcion den sector laboral manera entre otro carpinte, mecanico, koelmontuer como escogencia.

Ta papia di alrededor di 48 maestro cu te ainda ta wardando contesta di Minister di kico ta bay pasa cu nan, mientras di su banda e tabata bisa nan cu nan lo bay combersa riba e tema di “no work no pay”, overuren , pago riba lesuren y asina por keda menciona mas punto. Tur esaki e Minister a bisa di lo bay pasa riba documentonan, lo bin cu un contesta y ta laga e docentenan sa.

Den e siman di vacantie aki pa nan sorpresa, e docentenan ta haya tende for di e propio alumnonan cu bureau di minister ta yamando nan directamente pa duna informacion cu dialuna entrante nan lo ta ubica na Enseñansa pa Empleo mientras diaranson pa diabierna lo ricibi practicum na EPB Playa. E Minister aki a bay rond busca otro hende den sector priva como tambe den sector publico pa reemplasa e docentenan y asina duna les na e alumnonan.

Cu asombro por constata cu mayoria di e hendenan cu e ta reclutando no tin pedagogiek, no obstante cu nan lo por tin un titulo, nan no ta capacita pa duna les. Minister Rudy Lampe a pone e 48 maestronan aki un banda, sin bisa nan nada, tras di nan lomba yama e alumnonan avisanan cu aña escolar nobo ta cuminsa dialuna pero cu otro maestronan dilanti klas.

Parlamentario Sneek ta di opinion cu ta otro locura mas cu ta mira di e MInister di Enseñansa y ta inaceptabel. Cu esaki ta bira e di 6 biaha cu fraccion di AVP ta urgi y yama pa un reunion publico. Ta spera cu Presidente di Parlamento duna oido na e peticion y yama un reunion publico pasobra ta imposibel cu tin tanto cos ta pasando den Enseñansa y e 12 parlamentarionan cu ta sostene e gobierno aki ta complice!

Parlamentarionan di MEP igual cu e Minister tambe ta haya e peticionan di AVP, nan tambe ta haya e yamadanan pa pone un reunion publico y di nan parti tampoco ta haci nada y no ta pidi Presidente pa yama e reunion publico pa asina e Minister bin duna cuenta riba kico ta pasando.

Idea descabeya pa insisti di lanta un stichting, bou cual stichting tur hende ta bay. Maestronan di OAA no a haya carta/ ni contesta. Un persona sinta ta tuma nomber di tur alumnonan, for di dje a kita e lista y avise via whatsapp cu e no ta na OAA mas y pa e presenta otro caminda. Momento cu sindicato a manda e persona aki bek na su puesto, nan a bay cu tur documento y pasa tur informacion y nombernan di tur studiante nobo pa e stichting nobo. For di stichting nobo a cuminsa tuma contacto cu alumnonan y avisando nan cu nan lo csy awo bou di un stichting nobo. Un locura caminda un Minister ta bay tras di lomba di e maestronan aki sin aviso alguno.

Pa e motibo aki ta pidi un reunion publico pa asina e bin duna splicacion di su maneho y contesta tur e pregunta y incertidumbre cu ta biba den Enseñansa. Sneek ta comenta cu avalancha di yamada ta drenta cerca nan pero no por duna nan contesta pasobra te cu awo ainda e Minister no a bin duna ningun tipo di splicacion. Mientrastanto e Minister ta keda sinta cu e maestronan, palabra algo den reunion y sali haci diferente. Ta locual ta tumando luga atrobe cu e docentenan di OAA.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio