Home Local Aruba lo celebra #Erasmusdays 2019

Aruba lo celebra #Erasmusdays 2019

SHARE

ORANJESTAD – Departamento di Relacionnan di Reino y Union Europeo den colaboracion cu Departamento di Enseñansa Aruba, lo organisa pa promer biaha #Erasmusdays na Aruba.

Desde aña 2017, bou iniciativa di e agencia nacional di Francia encarga cu desaroyo y ehecucion di e programa di subsidio di Union Europeo Erasmus+, Europa y mundo ta celebra anualmente e logronan di e proyectonan subsidia cu e fondo aki. E aña aki e celebracion di #Erasmusdays ta tuma lugar oficialmente riba 10,11,12 di october 2019.
Considerando e exito grandi cu Aruba ta hibando como un Pais-Teritorio (ultramar)di Union Europeo cu e subsidio aki, lo organisa den cuadro di #Erasmusdays 2019, un evento informativo pa tur e cabesantenan y directivanan di scol. A dicidi di tene e evento aki riba 15 di october 2019, ya cu e tres fechanan menciona anteriormente ta cay denter di e periodo di vacacion di scol na Aruba.
E evento lo tuma lugar den e auditorium di Colegio EPI cu e meta principal di informa mas hopi di nos scolnan posibel riba e oportunidadnan existente pa entre otro nan instituto, docentenan y alumnonan.

Ariba e dia aki, diamars 15 di october 2019, lo tuma lugar presentacion di e dos departamentonan menciona y tambe di algun di e stakeholders principal, manera Universidad di Aruba, CEDE Aruba y EPI. E instancianan aki lo elabora riba nan experiencia, exito y e retonan cu por tin den desaroyo di un proyecto y e procedura pa peticion pa subsidio.
E evento aki ta registra oficialmente riba e pagina web di celebracion di #Erasmusdays www.erasmusdays.eu di Comision Europeo y ta spera di por crea visibilidad rond mundo cu esaki compartiendo Aruba su exito.
Erasmus+

Erasmus+ ta e programa di subsidio di Union Europeo disponibel pa entre otro: insitutonan academico, scolnan, organisacionnan di boluntario, organisacionnan pa hobennan, como tambe deporte. Bou capa di un proyecto specifico ta crea mobilidad di individuonan entre e paisnan participante, of por financia desaroyo di cooperacionnan strategico entre e institutonan/ organisacionnan pa por ehempel innovacion y reforma di nan maneho. Tambe tin oportunidad pa subsidio pa e desaroyo di maneho specifico di gobierno den sector laboral pa nos hobennan. E actual ciclo financiero di Union Europeo 2014-2021 tin mas o menos €14.7 miyon disponibel y esaki lo bay redobla te cu €30 miyon pa e ciclo financiero nobo di 2021-2027.

Ta invita un y tur pa like e paginanan di facebook di Europe House Aruba, Erasmus+ Aruba y tambe di e stakeholders menciona pa por sigui e desaroyonan y keda informa tocante e oportunidadnan cu e programa aki ta brinda Aruba.