Diahuebs atardi, Prome Minister Evelyn Wever-Croes a presencia e apertura di e cas pa mamanan hoben na Stichting Casa Cuna Progreso. Na e facilidad aki di Casa Cuna, un mama hoben, en bes di laga su baby na Casa Cuna su so, ta haya un luga pa e biba temporalmente cu su baby y haya guia y sosten pa e bira un bon mama pa su yiu. E facilidad aki ta conta cu 4 camber y lo cuminsa opera 14 october proximo. Esaki ta un proyecto sumamente bunita y necesario pa nos comunidad. Na e ocacion aki, Prome Minister a duna un discurso cortico motivando tur esnan presente pa sigui guia e mamanan hoben den un miho caminda.
Casa Cuna ta e organisacion na Aruba cu pa 62 aña caba ta brinda muchanan entre 0 cu 8 aña, cu pa un of otro motibo no por permanence na nan cas, un ambiente sigur pa biba. Un etapa nobo a cuminsa pa Casa Cuna. Den nan experiencia trahando cu mucha, nan a bin señala un otro necesidad den nos comunidad, esta un cas unda mamanan hoben hunto cu nan yiunan por haya un luga di biba y guia pa nan por ta independiente. E iniciativa aki ta un di e 31 proyectonan di Crisis Plan Social. Pa medio di e fondonan aki Gobierno ta sostene tur iniciativa cu ta contribui na prevencion of ayudo pa nos muchanan.
E Crisisplan Social ta traha na e meta pa drecha e situacion insigur y di violencia cu hopi mucha y hoben ta bibando aden dia pa dia aki na Aruba. Cu e destinacion ey a crea na Casa Cuna cuatro espacio unda cu mamanan hoben por siña y haña guia di Casa Cuna con pa lanta nan yuinan sano y sigur. Cada mucha y hoben tin derecho di por lanta cu alegria sin problema y cu siguridad. Casa Cuna ta brindando e ayudo aki pa nos mamanan hoben por enrikece nan habilidadnan den comunica miho cu nan baby y nan yiunan.
Meta di e cas pa mama hoben ta pa evita cu e yiu ta wordo separa di su mama y su famia, yuda e mama desaroya ‘good parenting skills’ y acapara riesgonan den e lantamento di yiu(nan).
Den esaki Casa Cuna a traha huntu cu diferente instancia pa hai esaki posibel. Entre otro Stichting Fier, Cede Arubay Social Crisisplan.
Mester bisa cu Casa Cuna ta traha en conhuntu cu deferente otro partner den veld manera Voogdijraad, Bureau Sostenemi, Departamento di Asunto Social, Stichting Guia Mi, Wit Gele Kruis, Hospital, Docter di cas etc.
“Cu poder di Dios otro aña nos lo crea mas cupo den e proyecto aki p’asina por brinda mas espacio na mas mamanan hoben pa haña guia y sosten den e lantamento di nan yuinan.
Un danki grandi tambe na nos minister di Asunto Social, sr. Glenbert Croes, cu ta haciendo un tremendo trabou riba e tereno social pa yuda nos hendenan enfrenta diferente reto social.
Na gerencia y personal di Casa Cuna masha pabien y hopi exito cu e proyecto”, Prome Minister a expresa cu satisfaccion.
