Home » Historia di Kapel di Alto Vista, recordando Maria Francisca Pietersz Lacle dfm. riba su fecha natal

Historia di Kapel di Alto Vista, recordando Maria Francisca Pietersz Lacle dfm. riba su fecha natal

by Admin
0 comment 173 views

Fuente di informacion: Ricibi di Dufi Kock y tambe saca for di un agenda di Sra. Maria Francisca Pietersz Lacle dfm. a skirbi na aña 1972, pa e celebracion di 20 aña di Kapel di Alto Vista

E articulo ta dedica na honor di Maria Francisca Pieterz Lacle Dfm. kende a nace dia 4 di Oktober 1908 y a fayece 6 di Oktober 2008. Maria Francisca, mihor conoci como Shonkita of Tantan, manera hopi den su famia tabata yame, ta e persona cu a bin cu e idea di construi e kapel di Alto Vista, tambe na tur nos grandinan cu di un forma of otro a aporta y otronan cu te awe ta aporta na e mantencion di nos Kapel di Alto Vista.

Tambe na honor di Mama Maria di Alto Vista, Reina di Santo Rosario, cu dia 7 di oktober ta e dia di nos Patrona stima Mama Maria di Alto Vista, Reina di Santo Rosario y den e temporada aki tin un programa cu a cuminsa 28 di September cu un nobena.

E religion Catolico e religion mas grandi na Aruba
Alto Vista ta caminda e religion Catolico a haci su entrada mas cu 250 aña pasa na Aruba. Alto Vista tabata e cuna di e religion Catolico, cu ta e religion mas grandi na Aruba, un 80% di e poblacion di Aruba ta Catolico.

Deseo di traha un kapel ta data for di 1917
E Kapel di Alto Vista actual, tin mas cu 67 aña cu ela wordo construi. Señora Maria Francisca Lacle dfm., miho conoci como Shonkita of cariñosamente yama Tantan pa su famia semper tabata tin e deseo pa construi un kapel y e deseo aki a cuminsa for di tempo cu e tabata un mucha muher di 9 aña, na momento cu ela confirma na aña 1917. Especialmente despues cu ela tende e storia di Alto Vista. E deseo di traha un kapel na Alto Vista, nunca a kita.

Shonkita cu ayudo di su rumannan, famia y tambe di henter e pueblo di Aruba, a logra realiza su deseo. E no tabata facil,pero ela keda persisti te cu ela perserva pa cumpli cu su deseo.

Hopi hende local y turista ta bishita Kapel
Awe hopi di nos hendenan cu ta catolico ta bishita e kapel di Alto Vista pa resa, pa haya paz den nan curason. Hopi ta bay pa pidi y gradici La Birgen pa un fabor, na momento di malesa, na momento di problemanan  cu ta mustra cu no tin solucion, na momento di tristesa. Tambe na momento di alegria y ora cu nan oracionnan wordo scucha of pa papia cu Dios.

No ta solamente nos arubianonan cu ta catolico, pero turistanan tambe ta bishita e kapel di Alto Vista. E kapel di Alto Vista awendia a bira un atracion Turistico grandi, cu ta den e ruta di cualke operadora cu ta haci tour rond di nos isla.

Comienso di e historia di Kapel di Alto Vista actual
Storia di Kapel di Alto Vista actual a cuminsa na aña 1944 tempo cu Shonkita a cuminsa cu un scol di kose na Noord, den Club Don Bosco. Na e mesun aña aki Pastoor Frunt a scirbi algo ariba Alto Vista den corant y mesora Shonkita a corda riba e debocion di su tantanan bieu. Shonkita a dicidi di acerca Maria Tromp cu ta un deboto di La Birgen y tabata traha hunto cu Shonkita Pro Deo na Noord.  Maria mesora a bay di acuerdo cu Shonkita y nan a bay cerca Pastoor Frunt y nan a conte nan plan pa traha un nicho na e lugar caminda ta conta te ainda ta wordo conta den Historia di Aruba. Pastoor a conseh’e pa bay papia cu Obispo Van de Veen, Zeppenveld referente su deseo.

Recaudando pa prome biaha fondo pa asina por construi e Kapel
Na e mesun aña aki ela cuminsa busca hende pa yud’e, pero placa tabata un di e dolor di cabes nan. Shonkita no a para keto, Shonkita a acerca Wadji Tromp dfm, kende tabata doño di un cunucu pa asina haci un picnic pa recauda fondo. Ora cu ela bisa Wadji kiko tabata su idea y cu ta pa Alto Vista, mesora ela bay di acuerdo y a duna Shonkita e cunucu, riba un Diadomingo, cu stul, mesa, mat’i coco etc. Ora e hendenan di Noord a tende cu ta pa recauda fondo pa Alto Vista, nan a bira contento y durante e picnic aki, a logra recauda pa e tempo ey un bon suma di placa cu tabata 2 mil florin. Shonkita a hiba e suma aki di biaha na banco.

Bale la pena traha un kapel akinan
Na Aña 1945 nan a bay busca e piso unda e debotonan tabata bay resa antes, pero nan no a logra haye, paso e mondi tabata mucho cera. Na 1946 nan a bay pa di dos biaha na Alto Vista pa busca e piso y e biaha aki nan a bay cu dos persona cu si ta bon conoci cu e area aki y asina nan a logra haya e piso di loke a resta di e kapel bieu, caminda ainda algun hende di Alto Vista mes tabata bay resa rosario y haci procesion. Mesora Shonkita a pensa awel ta bale la pena traha un kapel.

“Pa kabritu boso ta traha kapèl?”
Shonkita a cuminsa acerca tur e debotonan di La Birgen pero a yega e momento pa ban papia cu Obispo. Nan a tuma un avion mainta y a bay Corsou cerca Obispo, na yegada Obispo a puntranan kiko nan a bin haci, nan a cuminsa acerca Obispo poco poco, cu nan ta busca e tereno di Alto Vista pa nan pone un Imagen di La Birgen eynan. Obispo mesora a contestanan puntrando nan si nan cabes no ta bon, pone un La Birgen bunita den mondi pa Cabrito of pa hende burachi kibr’e. Boca keto nan a retira y a bin bek Aruba.

Shonkita no a laga nada demotiv’e y a keda persisti
Shonkita no a laga esaki demotiv’e y ni deshaci di su deseo, ela lanta un comision hunto cu Pastoor Frunt y hopi hende di Noord, pa asina nan recauda mas fondo. A pasa dos aña y Pastoor Frunt a bisa shonkita, boso purba bay awo cerca Obispo, e di dos biaha nan a bay pa pidi pa un imagen den un nicho cu tralie di hero, di tres biaha tabata pa pidimento di un misa habri tambe Obispo tabata contra y a bisanan lubida.  Shonkita a regresa Aruba tur tristo, pero Shonkita a keda persistente y a sigui recauda fondo.

“Traha loke boso kier anto”
“Pato den Awa y pisca den vijver”

Na aña 1950 Shonkita a pensa por celebra 200 aña di Alto Vista, pero esaki nan a lag’e pasa keto.  Ela bolbe subi avion bay Corsou, pero e biaha aki ela bay dicido y bon prepara. Ela bisa Obispo awe ta ultimo biaha cu mi ta bin cerca bo, ta un SI of ta NO. Si ta No mi ta coi tur e placanan cu mi a recauda durante añanan pa traha e kapel, mi ta partie pa hende. Obispo a bise: ” bo no por parti’e pa hende, lag’e pa Misa”

Obispo a yama Shonkita pa malcria y despues ela bis’e awel bay traha loke boso kier anto. Shonkita a mustr’e e mapa di e kapel, Obispo a bise “boso cuenta”. Shonkita a bira hopi contento y su reacion tabata ” Pato den Awa y pisca den vijver”

Shonkita porfin a regresa Aruba cu un bon noticia
Na yegada na Aruba tur hende tabata hopi contento cu Shonkita a logra, asina nan a cuminsa cu e construccion di e Kapel actual di Alto Vista. Shonkita su ruman Mario Lacle e tempo ey tabata tin un trabou di construccion, Shonkita mesora a acerca su ruman pa yude construi e kapel.

Construcion di e Kapel a cuminsa
Na 1952 porfin e deseo di Shonkita a keda realisa, dia 19 di maart 1952, riba fiesta di San Hosé, Mario Laclé, ruman di Shon Kita, a cuminsa cu trahamento di e kapel. Girigorio Franken a coba e fundeshi. Mientras ku Chapin Figaroa, un habitante di Noord, tabata trece tur dia dos drums di awa pornada.

E Kapel di 200 aña pasa no tabata tin nada mas eynan, pero ora a coba e fundeshi nan a bin haya un piso, nan a cuminsa rosa e mondi y habri caminda paso e tempo ey ta cabrito so tabata pasa bay eybanda. Mario a conta cu nan tabata traha 8 ora cu pago y tur trahador a bay di acuerdo pa traha tur dia 2 ora extra sin pago. E construccion di e kapel a dura solamente 6 siman.

Prome cu e kapel a habri, hopi hende a yuda riba nan diasabra liber pa hala e piedranan grandi for di kaminda y pa drecha e kaminda pa bai e Kapel. Felix Garrido, casa di Anna Laclé, ruman di Shon Kita, a organisa e trabou aki.

Kapel a keda cla y dos dia despues Monseñor a bendiciona e kapel
Dia 23 di mei 1952 e kapel a keda cla, pero no tabatin e cura di piedra ainda, ni banki pa sinta pafo den cura. Den e kapel mes tabatin solamente 4 banki bieu di Hospital San Pedro.

Dos dia despues ku e kapel a keda cla Monseñor Zeppenfeldt a bin bendicion’e bou di un interes enorme di henter Aruba, segun Shonkita a conta e tabata masha plechtig mes.

Atardi pa 4’or nan a bin buska imagen di La Bírgen na Misa Santa Ana pa pon’e den un Cadillac habrí pa hib’e Alto Vista. Ora e auto a yega, 12 homber, dos di cada parokia di Aruba, a carga e imagen hiba den e kapel den un prosesion largo di welp, muchanan di scol i varios grupo di tur parokia di Aruba.

Banda di 5’or di atardi Monseñor Zeppenfeldt a yega den compania di su secretario, Pastor Erkamp, Pastor Gallé di Noord i Pastor J. Burgemeester di Oranjestad. Monseñor Zeppenfeldt a bendishona e kapel di Alto Vista y a spierta e pueblo di Aruba den su predicashi mas despues pa keda na nan fe den Cristu i na nan amor pa Mama Maria.

Desde e dia aki e kapel di Alto Vista a bira e kapel mas importante na Aruba, gruponan ta reuni y resa rosario. Bierna Santo procesion for di diferente parti di Aruba ta bin cana e caminda di cruz.

Corona di oro pa La Birgen di Alto Vista y pa Niño Hesus
Dia 24 di november 1954 a corona e imágen di La Bírgen di Alto Vista den Wilhelmina Stadion, ku un corona di oro dorna cu 78 piedra precioso. Henter pueblo di Aruba a kontribuí pa duna nan Mama Maria stima su corona. Tabatin hende pober cu no tabatin placa pa duna, pero cu a ofrecé nan renchi di casamento di oro y otro prenda cu tabatin hopi balor pa nan. Pa tur hende lo por mir’e bon, e corona a pasa den tur parokia i a para den tur misa un diadomingo.

Balor di e corona aki e tempo ey tabata di 4500 florin y e tabata un obra di e artista Bob Anink di Blaricum, Hulanda, ruman di Pastor B. Anink, kende tabata pastor di Noord di 1956 pa 1960.

Dia 25 di mei 1957 e Niño Hesus tambe a haya un corona di oro. Pastor J. Burgemeester, cu asistencia di Pastor Anink, Pastor Fick y Pastor C.v.d. Looy, a hasi e ceremonia den kapel di Alto Vista, den presencia di masha hopi hende.

Destruccion cometi na e imagen den Kapel di Alto Vista
Riba 11 di Mei 1997, un mucha homber bou influencia di droga of alcohol a destrui e imagen di La Birgen den kapel di Alto Vista, esaki a causa un tristesa grandi bou di e debotonan di Mama Maria di Alto Vista, Reina di Santo Rosario. Rumornan tabata core cu wela di e mucha homber aki a rabia asina hopi y a haya hopi duele, cu ela bira malo te cu elo a fayece.

E imagen original di 1952 a keda hopi destrui, cu a dicidi di laga traha un otro pa pone den Kapel, cual ta e La Birgen cu tin actualmente. Esun di aña 1952 a wordo restaura y aparentemente ela wordo poni na Hospital.

25 di Mei 2002, celebracion grandi di 50 aña di existencia di e Kapel actual
Na Aña 2002 e kapel a cumpli 50 aña di existencia y tabata tin un bunita celebracion na e kapel aki, caminda Shonkita, Mario y tur  su ruman tabata presente como invitado di honor, mester bisa cu famia di Shonkita semper a keda bay fielmente Kapel di Alto Vista. Recordando e bunita obra di caridad cu Tantan (manera e tabata wordo yama) a haci pa e religion Catolico na Aruba.


Esaki ta Shonkita hunto cu su rumannan stima Mario, Adelinda y Margo, tur dfm.

Tur aña ta celebra cuminsando for di fin di September te cu dia 7 di Oktober  e Fiesta Nacional Catolico mas grandi, Nos Patronal Mama Santisima Virgen Mama Maria di Alto Vista.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio