Savaneta: Diabierna den careda di 8’or y mey di anochi, ta sosode un atraco arma, mesora ta manda diferente unidad di polis na e supermarket Chun Ho, cu ta keda den e mesun caya di Ex Hotel Roys, pero un poco mas pariba.
Na yegada enberdad nan ta papia cu algun testigo cu ta contanan cu 3 persona bisti full na preto, cara tapa y cu arma di candela den nan man a drenta den e supermarket y a ranca dos caha di placa bay cune, tambe nan a pasa man pa cigaria, carchi telefon y algun cos mas.
Prome cu nan a bandona e sitio un di e atracadornan a agredi e chines cu e arma di candela cu e tabata tin den su man, ela dal e chines na su cabes.
E trio a huy cu e botin riba un scooter y nan a bay direccion di Mabon.
Esaki ta mustra e mesun modus operandi di e atraconan cu a tuma lugar, mas o menos dos siman pasa na Pos Chikito y Cura Cabay.
Tambe ni 24 ora pasa tabata tin un atraco arma riba un negoshi den Caya Jose Geerman, no ta conoci si por ta trata di e mesun atracadornan.
Varios Unidad di polis ta moviendo rond den e area aki, tambe a pidi pa presencia di ambulance pa haci un checkeo medico cu e victima. Atraco Team y e departamento tecnico di polis a wordo pidi na e sitio. E suma cu e atracadornan a bay cune te na e momentonan aki no ta conoci.
Cualke persona cu a mira un movecion straño, cualke scooter of tres persona bisti na preto actuando sosopechoso, especialmente den e areanan aki di Savaneta y Mabon, por fabor tuma contacto mesora cu polis.