Tabata 40 aña pasa, riba prome di October di aña 1979 pa ta exacto, cu e tempo ey Diputado Nelson Orlando Oduber a cuminsa cana e caminda pa duna Aruba su propio compania di transporte publico. Asina, ariba dia 1 di October di aña 1979, Gobierno Insular di Aruba a tuma mando oficialmente di e transporte publico for di e compania priva West End Company.
E tempo ey a nombra sr. Ing. Edison Briesen como e Gerente General di e compania, cual ainda no a keda oficialisa como ARUBUS NV. Despues di un proceso cu a dura algun luna, unda cu a reuni cu e diferente stakeholders di transporte publico na Aruba, Gobierno Insular e tempo ey a evalua e beneficionan y conscecuencianan pa bin cu un compania estatal di transporte. Di e manera aki a yega na inaugura e Compania Arubiano di Bus, ARUBUS NV, oficialmente ariba dia 15 di maart di aña 1980.
For di su nacemento ARUBUS NV a pasa den retonan grandi, pero semper a sa di cumpli cu su meta principal; brinda un servicio di transporte publico pa henter pueblo di Aruba. Y te ainda awe esey ta keda vigente pa nos Compania Arubiano di Bus. Como compania estatal semper a tene su mes na e principio di cual el a wordo funda y asina a logra cumpli 40 aña di existencia.
Pero awor, 40 aña despues, ARUBUS NV ta drentando un era nobo cu ta priminti di hiba e compania na un futuro mas frutifero y stabil. Ta cu e pensamento aki den mente cu Gabinete Wever-Croes a pone como un di su metanan pa apoya e restructuracion di ARUBUS NV, door di haci un inversion absolutamente necesario cual ta enfoca principalmente den e rehubenecemento di e flota pa asina brinda un servicio competitivo y confiabel.
Bou di un direccion nobo, Gobierno di Aruba ta deliniando un maneho cu ta na beneficio tanto di e usuario como di e empleadonan. Nos Gobierno tin pleno confiansa cu den persona di sr. Edwin Mohamed, como Director di ARUBUS NV, e compania aki lo drenta un era nobo yena di productividad den tur aspecto y innovacion constante, pa asina yega na ta e lider den transporte publico pa nos isla.
